Nuuk

Sulisitsisoq: -Kangiamiut kalaallinit naatsorsuutigiuminarnerupput

Kalaallinik iggarissunik inuussutissanut tunngasunik ilinniarsimasunik atorfinitsitsinissaq ajornakusoortarmat neriniartarfiutilik Krissie Winberg Berthelsen kangiamiunik igasoqarpoq

kokke
Krissie Winberg Berthelsenikkut sutorniartarfiutaanni tassaasuni Pizzahuset & Grill, Sushihuset, Caffe Pascucci aamma Esmeraldami katillugit arfineq pingasunik allamiunik igasoqarput

Nuummi sutorniartarfiit ornigarneqarluartartut ilaanni Cafe Pascuccimi, Nuuk Centerimiittumi piginnittoq Krissie Winberg Berthelsen ulapaaqaaq. Taassuma kalaallinik iggarissunik inuussutissanik tunngasunik ilinniarsimasunik sullarissunillu atorfinitsitsinissani ajornarkusoornerarpaa.

Krissie Winberg Berthelsen Thailandermiunik Filippinerermiunillu sutorniartarfiutiminni sisamaasuni agguataarsimasunik arfineq pingasunik igaffimmioqarpoq.

Krissie kalaallinik igasunik sulisoqarsimanngilaq. Inuusuttunillu nunaqavissunik sulisoqaleraangamik suliartunngitsoortarneq, sulinianngikkaannilu nalunaanngitsoortarneq kiisalu suliffimmut piumasaqaatinik naammassinnissinnaannginneq pissutaallutik allamiunik sulisoqarnissi orniginartinnerulersimavaa, taamaattorli nunaqavissunik arlalinnik igasuunngitsunik sulisoqarpoq.

- Kalaallit amerlasuut akisussaaffimmik tigusisinnaarpiarneq ajortut amerlavallaarput. Allaanngilaq meeqqanik mikisunik naalatsitsiniaaginnaavilluni, tamannalu eqqarsartaaseq nunatsinni naliginnaavallaaqaaq. Inuusuttuaraallunga taamaallunga eqqaamavara, kangiamiulli taamaanngillat. Nuummi igasunik nunaqavissunik sutorniartarfiutitsinnut tulluussinnaasunik pissarsisinnaasarsimanngilanga, taamaammat allamiunik igasoqarnissara orniginartinnerusarlugu, Krissie Winberg Berthelsen qungujulalluni oqarpoq.

Sulineq inuuneriinnarpaat

Zara Fiore De Ocampo, sapaatip akunnerata siuliani aviisimit allaaserineqartoq akunnerpassuit sulisarpoq. Ulluinnarni Bonesimi sulinik aqutsisutut saqisutullu sulisarpoq, sapaatillu akunnerisa naanerini imerniartarfinni erinarsortarluni.

- Akunnerpassuit sulisarnera nammineq piumasaraara, meeqqakka pilersortariaqarakkit, aningaasarpassuarnik nassittarpakka atuarniassammata, oqarpoq.

Zara ilinniartitsisutut ilinniagaqarpoq, nunaminili atorfinissinnaannginnini pissutigalugu meeqqani pingasut tallimanik, arfineq pingasunik, qulinillu ukiullit qimaannarlugit nunatsinnut suliartortariaqalersimalluni.

-Artornartorujussuuvoq qimaqqallugit, maqaasisaqaakka. Ingammik skypekkut oqaluukkaangakkit (qarasaasiakkut imminut isigaluni oqaloqatigiittarfik aaqq.), nuannaartaqaalli takugaangaminnga. Angajoqqaakka tallimanik ukioqarlunga toqupput, meeqqakkalu atsama paarivai, Zara qullipilluni oqaluttuarpoq.

Zara akissarsiagissaarnerarpoq, akissarsianilu naammagisimaarlugit.

Krissiekkut Kangiamiunik sulisuminnik namminneerlutik tikisitsinikuunngillat. Kangiamiunik sulisussarsinissaminnik ajornartitsisarsimanngillat, sulisuilu Kangiamiut namminneerlutik Krissiekkut ornillugit suliffissarsiortarlutik.

Nunanit naqisimaneqartuneersut

Krissie Winberg Berthelsenip sulisumi kangiamiut nunaminni piitsuugamik maanga suliartortariaqartartut erseqqissarpaa.

- Sulisukka allamiut nunaminni piitsuupput suuteqanngingajavittarlutik. Maanga suliartortarput meeqqatik angajoqqaaminnut qimallugit, pilersorniassagamikkit atuarniassammatalu. Taakkununnga naliginnaavoq meeqqat qimallugit aallarluni suliartortarneq, Krissie Winberg Berthelsen oqarpoq.

Sulisuisa Kangiamiut ukiut pingasut suleqqaarlutik aatsaat angerlarsinnaanertik naatsorsuutigisarsimavaat, allanimi suliffeqarfinni piumasaqaataasarsimammat. Sapaatip akunneranut minnerpaamik akunnerit 40 sulisarput, naak amerlanerit freerfeqarpiaratik sulerusuttaraluartut.

- Freerfeqarnissaat pingaartipparput, meeqqatik ilaquttatillu ilagisinnaaniassagamikkit. Suleqatigiit ataatsimoortikkaangatsigit tupigusuttarput, tamakkumi sungiusimannginnamikkit. Ukiumut marloriarluta sulisugut ataatsimoortittarpagut, nereqatigiilluta aasakkut kiisalu juullikkunni. Inuttut akuunissaat pingaartipparput, uagutsitummi inuupput misigissuseqarlutik sulisiinnagassaanatillu. Isumaqarpungali nammineerlutik inuiaqatigiinnut akulerunnissartik akisussaaffigigaat, Krissie Winberg Berthelsen aalajangersimarpasilluni oqarpoq.

Kangiamiut Nuummi suliffeqarfinni allani sulisooreersut Krissiemut suliffissarsiukkajupput. Suliffissarsioraangata suliffigisaminnit isumaqatigiissutit ilaatigut takutittarsimavaat, taakkulu tupaallannartortaqartarsimapput.

- Akilerneqarpiarnatik sulisitaasarsimapput, allaat akunnermut minnerpaamik 50 koruunimik akilerneqartarlutik, tamannalu akuersaarneqarsinnaanngilluinnarpoq. Naak taakkununnga aningaasarpassuugaluartut, naligiittussaavugut, uagullu isertuunneq ajorparput sulisutsinnut akunnermut 100-115 koruunit akornanni akissarsisitsisaratta. Igaffimmiutta qaammammut 22.000 koruuniniit 26.000 koruunit akornanni akissarsiaqartarput, taassumunngalu pissutaavoq illinnartunik suliaalluartunillu sassaalleerusuttaratta, Krissie Winberg Berthelsen oqarpoq.

Nunatsinni naliginnaasumik igasup qaammammut akissarsiai aallartissutaasartut 19.000-miit 22.000 koruunit missaanniittarput.

Nunaqavissunik sulisoqarusuppoq

Katuami pisortap Julia Parsip nunaqavissunik sulisoqarnissi pingaartippaa, tamannalu Katuami oqaatsinik politikkianit tunngaveqarluni.

- Maani pingaartitaraarput sullinneqartut kalaallisut qallunaatut tuluttullu sullinneqarsinnaanissaat, tassani eqqarsaatigineqarput siulersuisut, piginnittut, tapiisartut, tusagassiuutit politikerit il.il. naammaginartumik oqaatsitigut sullissisinnaaneq pineqarpoq, oqarpoq.

Taamaattorli Katuap sutorniartarfiani Thailandermiumik erruisoqarput. Taanna ISS aqqutigalugu pissarsiarineqarsimavoq.

- Allamiunik sulisoqarnissarput ammaffigaarput, nalunnginnatsigu atorfinni taamaattuni sullivik allanngorartorujussuusartoq. Kommuneqarfik Sermersooq aqqutigalugu sulisoqartarneq misilittagaqarfigaarput, kisianni misilittakkagut naapertorlugit ilaatigut nunaqavissut annerpaamik sapaatip akunnera ullulluunniit ikittuinnaat tigummisarpagut, Julia Pars naggasiilluni oqarpoq.

Nuummi suliffissaaleqisut

Ukioq:

Amerlassusaat:

2009

350

2010

491

2011

576

2012

667

2013 (oktoberip tungaannaanut..)

807

Tusarfik: Naatsorsueqqissaartarfik

Nuummi suliffeqarfiit Kangiamiunik sulisullit

Amerlassusaat

Charoen Porn

8

Cafe Prego

4

Katuaq

1

Sømandshjemmet

1

Igaffik

3

Anaana mad

4

Sawadee

5

Video butikken

4

Sanap kantiinaa

1

Matas

1

Nipisa

2

Bones

8

T.H Rengøring

7

Cafe Chilli

Ippiarsuk

Polar Raajat

Spar Qinngorput

5

1

1

2

Sianeqattaarluni paasiniaanermi paasisat.

Allaaserisaq Nuuk Ugeavisimi nutaami atuarsinnaavat taanna akeqanngitsumik linki ataaniittoq atorlugu aasinnaavat

Powered by Labrador CMS