Sul: Isernerput ajugaaneq annertuujuvoq
Naalagaaffeqatigiinneq pillugu suliniuteqartut ilaasortaatitaqarnerat pingaaruteqartoq, Michael Rosing isumaqarpoq. AG-mi ukiortaassamut apersorneqarnermini taama oqarpoq.
Partiip pilersinneqaqqammersup Inatsisartunut ilaasortaatitaqalernera ajugaanerujussuusoq, Suleqatigiissitsisut isumaqarput.
Partiimi siulittaasoq Michael Rosing AG-mi apersorneqarnermini taama oqarpoq.
- 2018 tassaavoq Suleqatigiissitsisunik pilersitsiffipput Inatsisartunullu qinigaatitaqarluta. Partiitut nutaat tamanna nalissaqanngilaq. Ajugaarujussuarneruvoq pisullu sukkasuumik pipput, iluatsipparpulli. Partiini kisiartaalluta naalagaaffeqatigiinnerup ataannarnissaa kissaatigaarput, taamaattumik oqariartuutivut kikkut tamarmik namminersulivinnissamik oqalliffianni pisariaqartinneqarput isornartorsiuerpalaartumillu nipeqartariaqarluta namminersulernissaq piaartumik siunissamiluunniit ungasinnerusumi pinissaa apeqqutaatinnagu. Aamma inunnik isumaginninnikkut pingaartitatsinnut oqallinnerup sangutinnissaa iluatsipparput taamatuttaarlu illuatungiliuttuulluarneq iluatsillugu Nunatsinnilu aqutsinerup ammasumik pinissaa sunniuteqarfigalugu, taanna oqarpoq.
AG-p partiimi siuttut tamaasa ukioq qaangiutilersoq kingumut qiviarfiginissaanut siunissarlu pillugu apeqquteqarfigisimavai. Apersuinerit tamakkiisut aviisimi atuarsinnaavatit: