Suliniut: Lupinit iliveqarfinniit piiarlik
Nammineq kajumissutsiminik suliaqartoq Nuummilu najukkami ataatsimiititaliami ilaasortanngoqqammersoq Nuummi iliveqarfitoqqat ilaanni lupininik piiaanissamik suliniuteqarpoq. Lupinit, avatangiisiminni naasunut allanut ipisitsisartut, ilerrit qaavinit piiarneqassapput.
Nuummi illoqarfiup nutaannginnersaata ilaanni, Noorlernut iliveqarfiani nipaalluinnarpoq. Iliveqarfik sungaartorsuarnit ivikkanillu qallerneqarsimavoq. Ilerrilli ilaat naasunit tungujortunit, lupininit, anorimit orfaatinneqarusaartunit qallersimaneqalersimapput.
Naasut portusuut tungujortut, kusanarluinnaraluarlutik avatangiisiminnut, naasunullu allanut inangiisarput. Taamaammat iliveqarfitoqqami naasut ipisinneqaraluttuarput inangerneqariartorlutillu. Noorlernut iliveqarfiani lupinit suneqanngikkunik kisimik takussaalertussaapput.
Danmarkimi avatangiisinut ministeriaqarfiup ilisimatitsissutigaa lupinit pinngortitami ajornartorsiutaalersinnaasartut, pingaartumik nuna tangeqarpianngippat. Ministeriap ilanngullugu ilisimatitsissutigaa lupinit nungusarneqarsinnaasut sorlaat ilanngullugit nutsunnerisigut.
Assaassutit saviillu
Naasoq lupin avatangiisiminut inangiisuusarpoq, kusanassutsinilu pillugu nunatsinnut eqqunneqarnikuusimalluni. Naasorli inuunertulluinnaraangat avatangiisaaniittut naasut ipigaluttuinnartarput, lupinilu siaruaatilertortarluni.
Avatangiisip tungujortikkaluttuinnarnissaa isiginnaaginnarumanagu Inge Marie Jensen Rosing nutsuaajartornissaminut piareersimavoq.
- Kusangisartorsuugaluarpakka. Kisiannili paasivara lupinit naasunut allanut ingiaasartut, avatangiisiminillu ipisitsisartut. Taamaammat aalajangerniarneq oqitsunnguuvoq, piiarneqartariaqarput, Inge Marie Jensen Rosing Sermitsiaq.AG-mut oqarpoq.
Nutsuinissamik piareersaapallanneq
Inge Marie Jensen Rosing Nuummi najukkami ataatsimiititaliami ilaasortanngoqqammerpoq. Taamatullu illoqarfimmi susoqarneranik malinnaanermini, nittartakkatigut inuit naapittarfiini lupinit pillugit ajornartorsiut paasivaa.
- Uninngaannarnanga qanoq iliuuseqarusunnerungama. Unnugumut naasunik nutsuaalluta piiajartornissamut aggersaaneq tassanngaannalaaraluarpoq, soqutigineqarluartorli maluginiarpara, oqarpoq.
Taanna Facebookikkut kaammattuuteqarpoq innuttaasut pisinnaasut Noorlernut iliveqarfitoqaani ataasinngornermi unnukkut nalunaaqutaq 19.00 naapinnissamik. Tassani lupinit piiarneqassapput.
Eqqaaveqarfiup puussiat aaqqatillu isumagaat.
- Tassa naapiinnariaavugut lupininillu piiaalluta. Amerlasuut takkussinnaappata naammassilertorsinnaavugut, oqarpoq
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...