Suliniutip nutaap atuanngitsoortarnerit ikilisinniarpai
Illoqarfiit pingaarnersaanni meeqqat atuarfiini atuartut atuanngitsoortartut amerlavallaarput. Atuanngitsoortarnerit atuarusunngissuseqartullu ikilisinniarlugit iliuuserisinnaasut pillugit ilinniartitsisut atuarfiillu pisortai pikkorissartinneqarput.
7,91 procentit. Nuummi illoqarfiup meeqqanut atuarfiini ukiumi atuarfiusumi atuanngitsoortarnerit agguaqatigiissillugit taama annertutigaaq. Agguaqatigiissillugu kisinnerat illoqarfiup meeqqanut atuarfiini tallimaasunit pingasut aallaavigalugit naatsorsuunneqarsimavoq, tamannalu isumaqarpoq atuanngitsoortartut procentinngorlugit kisinnerat annertunerusinnaasoq imaluunniit appasinnerusinnaasoq.
Qallunaalli meeqqat atuarfiini atuartunut kisitsit sanilliukkaanni qaffasinneruvoq, Danmarkimimi atuanngitsoortartarnerit ukiumut 5,9 procentiuvoq.
Atuanngitsoortarnerit ikilisinneqassapput
- Misissuinernit takutinneqarpoq meeqqat atuarfianni ukiuni atuarfiusuni tamani, qaammatit tamaasa ulluni marlunni atuanngitsoortaraanni, taava ukiup ataatsip ingerlanerani ilikkagassat annaaneqartartut, ilikkagassatullu annaasimasat ilikkarniarnissaat ajornakusoorsisartoq, Kommuneqarfik Sermersuumi Meeqqanut Atuarfeqarnermullu Ataatsimiititaliamut ilisimatitsissutigineqarpoq.
Ilinniartitsisut meeqqallu atuarfiini pisortat augustip aallartilaarnerani pikkorissarput, ineriartorneq pitsaanerusoq anguniassallugu qanoq iliortoqarsinnaanersoq pikkorissassutigalugu. Pikkorissarnermi siunertaavoq Nuummi ullut tamaasa atuariartortartut amerlanerulersinnissaat.
Kommuneqarfik Sermersuup 2020-mut anguniarpaa meeqqat atuarfiini naammassisut 80 procentii ilinniaqqiffinnut ingerlaqqittarnissaat. Taamaammat atuanngitsoortarnerit ikilisinneqassapput, atuartut ilinniaqqiffiusunut ingerlariaqqinnissaminnut tunngavissaqarluarnerussammata.
- Ilisimatusarnermit ersersinneqarpoq, atuanngitsoortarneq qaffasissimappat tamanna meeqqap inuuneranut sunniutilerujussuusartoq. Ilisimatusarnerullu aamma takutippaa, meeqqat atuanngitsuukulasarnerat qaffasikkaangat, taava inuusuttunut ilinniarfinni ilinniakkamik naammassisaqarnissaq ajornakusoortuusartoq, Meeqqat Atuarfeqarnerlu pillugit Ingerlatsivimmi pisortamit ilisimatsissummi allassimavoq.
Atuarfimmiinneq pitsaanerulersinneqassaaq
Meeqqat atuarfianniinnerup pitsaassusaa atuanngitsoortarnermut attuumasinnaasoq, pikkorissaanermi ilaatigut sammineqarpoq.
Massakkut atuanngitsoortarnerup aamma siunissami pinngitsoortinniarneqarnissaa pillugu, Meeqqanut Atuarfeqarnermullu Ingerlatsiviup ataatsimut malittarisassaliornissaa immikkoortunullu anguniagassanut erseqqissunik nassuaateqarnissaa pingaaruteqarpoq. Ataatsimut malittarisassat qaqugukkut atuanngitsoortarnerup ernumanartunngortarneranik, atuarfiup qaqugukkut atuanngitsoortarnerup qaffasinnera pillugu nalunaarusiortarnissaanik aammalu atuanngitsoortarnerup qaqugukkut akuerineqarsinnaaneranik imaluunniit akuerineqarsinnaannginneranik imaqartinneqassaaq.
- Innersuussutigineqarpoq Kommuneqarfik Sermersuumi atuarfiit atuartut atunngitsoortarnerat pillugu aaqqissuussaasumik aamma ernumassuteqarnermi qanoq iliuuseqartoqartarnissaanik isummissasut. Tamatumani Meeqqanut Atuarfeqarnermullu Ingerlatsivimmit kommunimi atuartut atuanngitsoornerat pillugu kisitsisit anguniagassat qanoq killeqartinneqarnissaat aamma atuarfiit tamarmik atuanngitsoortarneq pillugu, atuartunut nalunaarsuut digitaliusoq, Tabulex Tea, atorlugu sulisinnaanissaat isumagineqassaaq, innersuussutigineqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...