Suliniuteqareernermi malitseqartitsisarnerup Jane kiserliorunnaarsissimavaa
Inuunerup annersaani paaqqinnittarfimmi inuusimagaanni, inersimasutut inuulerluni nammineerniarneq artornarsinnaasarpoq. 25-nik ukiulimmut Jane Østbjergimut kommunip ikiorsiisimanera iluaqutaasimaqaaq.
Jane Østbjerg 13-inik ukioqarluni meeqqat angerlarsimaffiannut inissinneqarsimavoq, 23-nillu ukioqarluni allamut nuuttussaasimalluni.
- Inuppassuit akornganniittuaannartuulluni kisimiileriasaarneq oqimaassimavoq. Nuukkama allaanngilaq ilaquttakka qimallugit, taanna nassuiaavoq.
Meeqqat illuanni najugaqareerluni inersimasutut inuulerneq tarnikkut unammillernarsimavoq. 23-nillu ukiulimmut inissamik nassaarniarneq ajornaatsuinnaasimanngilaq.
- Angajoqqaakka Danmarkimiipput, sulilu ajorlutik, taamaammat ikiorsinnaasimanngilaannga. Kommunimi attaveqaatigisartakkama uannut tunngatillugu suliniuteqareernermi malitseqartitsiniarlutik allaffigimmanga eqqissiallassimaqaanga, taamaalillunga attaveqaataasartunit ikiorserneqarlunnga inissannik pissarsisimavunga, taanna oqaluttuarpoq.
Aamma atuaruk, Sermersuumi inuusuttut 19-it paaqqinnittarfiup avataani inooqqilernissaminnut sungiusartut
Kommuneqarfik Sermersuumi paaqqinnittarfiup avataani inooqqilernissamut sungiusaasarnissamik neqeroorut 2019-ip aallartinnerani aallartinneqarpoq, maannamullu inuusuttut arfinillit neqeroorummik atuisimallutik, taakkununnga Jane Østbjerg ilaavoq. Sulisut sisamaniit arfinilinngortinnqarnissaat kommunimit akuerineqarsimavoq.
Jane Østbjerg ilaatigut tarnip pissusaanik ilisimasalimmit ikorserneqartarsimavoq, sulisullu suliniutinut assigiinngitsunut ikiuuttarsimallutik.
- Tamatuma kinguneranik innangaannarlunga nikallunganissaraluannut sanilliullugu suliaqartarpunga, taanna oqaluttuarpoq.
Aningaasaqarnermik akiligassanillu aqutsiniarneq nalunartoq
Jane Østbjerg meeqqat angerlarsimaffianniinnermini suliassanik nalinginnaasunik, soorlu atisanik errorsinermik, nerisassiornermik eqqiaanermillu ilikkagaqarsimavoq. namminerli aningaasaqarnermik, akiligassanut akiliinissamik pisortanilu isumagisassanik nammineerluni isumaginnileriasaarneq imaannaasimanngilaq.
- Aningaasaqarnermik aqutsiniarneq nalunarsimaqaaq, aamma kommunimut atatillugu isumagisassarpassuaqarsimavunga qanoq ilillugit isumaginissaannik ilisimasaqarfiginngisannik. Taamaammat ikiortissaqarsimanera pitsaasuuvoq, taanna oqarpoq.
Ikiorneqartarnera kinguneqarluarsimavoq, maannalu nammineersinnaalersimalluni.
- pisortat ikiorsiisarnerannut ilaajunnaarpunga, taamaammat kommuni qangatut pisariaqartikkunnaarpara. Net aqqutigalugu isumagisassakka maanna isumagisarpakka, tamannalu nammineq aqussinnaalersimallugu isumaqarpunga, Jane Østbjerg oqarpoq.
Suliniuteqareernermi malitseqartitsinermik nammineerluni suliaqartoq
Aallartisarnermi kommunimit ikiorserneqarsimanngittuuguni qanoq ingerlasimanissaraluani eqqoriarusunngilaa.
- Tamanna eqqarsaatigerusunngilara. Uannut iluaqutaasimaqaaq. Meeqqat angerlarsimaffianneereernermi suliniuteqarnermi malitseqartitsineq annertoorujussuarmik iluaqutaasimavoq, Jane Østbjerg naggasiivoq.
Maanna meeqqat angerlarsimaffianni perorsaasumut ikiortitut sulivoq, inuusuttunullu sullitaminut atatillugu suliniuteqareernermi malitseqartitsisarnermik suliaqartartut attavigisarlugit.