Suliniut nutaaq: Inuusuttorpassuit tarnikkut ikiueqqaarnermi piginnaasaqalissapput
Ukiuni sisamani tulliuttuni inuusuttut tuusintilikkaat tarnikkut ikiueqqaarnermik pikkorissartinneqassapput. Tamanna ilaatigut nunatsinni imminut toquttartut amerlanerinut ikilisaaqataassaaq.
Ikinngummut imminut toqunnissamik eqqarsartumut qanoq oqartoqartarpa?
Taanna ukiut sisamat tulliuttut ingerlaneranni kalaallit inuusuttorpassuit ajornartorsiutit amerlasuut iliuuseqarfiginissaannut sungiusagassaasa ilagiinnarpaat. Ungdommens Røde Kors, inuusuttunik nuna tamakkerlugu tarnikkut ikiueqqaarnermik KRK-INUA-mik suleqateqartoq tusagassiuutinut nalunaarummi taama allappoq.
Suliniut Nordea-p aningaasaateqarfianit 6 millionit koruuninik, aamma Nunanut Avannarlernullu aningaasaliissutinit aamma 6 millionit koruuninik aningaasaliiffigineqaqqammerpoq.
- Tapiisoqarnera suleqatigiinnissatsinnut, suliniummullu isumalluarfigeqisatsinnut assut neriulluaamminarpoq, annerusumimmi innuttaasunut Kalaallit Nunaanni massakkut suliassatsinnut assigusunik peqarpianngilaq, tassa suliniutit eqqarsartaatsikkut peqqissuunermut, inuusuttullu akornanni inooqatigiinnermut tunngasut, Jonas Wiederholt Larsen Ungdommens Røde Korsimi siulittaasoq, taama oqarpoq.
Tarnikkut ajornartoorneq imaluunniit atugarliorneq
Oqariartuut taanna Erni Kristiansenimit, KRK-INUA-mi suliniummik aqutsisumit ilalerneqarpoq. Inuusuttut tarnikkut ikiueqqaarsinnaanissaat annertuumik pisariaqartinneqartoq, taanna isumaqarpoq.
- Inuusuttorpassuit ulluinnarni ilungersuuteqarput, kisitsisitigummi takuneqarsinnaavoq inuusuttut imminortartut suli amerlavallaartut. Kisianni aamma inuusuttut taakkuupput inuusuttoqatiminnut ikiuisinnaasut piukkunnarnerpaat.
- Ikiuissagunillu pisariaqartippaat eqqortunik iliuusissanik ilitsersuunneqarnissartik, Erni Kristiansen KRK-INUA-mi suliniummi aqutsisoq, taama oqarpoq
Tarnikkut ikiueqqaarneq periusaavoq inunnut inuit ajornartorsiulersut artorsaateqartullu qanoq ikiorneqarsinnaanerannik iliuusissanik piginnaasaqalersitsisartoq.
- Inuusuttut tarnip pissusaanik immikkut ilisimasaqartuusariaqanngillat aamma allatigut oqaloqateqarnermi ilinniarsimasuusariaqanngillat. Siunnersuissanngillat aamma katsorsaassanngillat. Kisianni taakkuusinnaapput kammalaatitik ajornartorsiulerpata iliuuseqartussat siulliit, Erni Kristiansen oqarpoq.
Nassuiarpaalu inuusuttunut tupannartumik pisoqartillugu qanoq inuusuttut iliuuseqartarsinnaanersut ilinniutigissallugu, pisariaqartillugulu saaffissanut immikkut ilisimasaqartunut qanoq, sumullu innersuussisarnissaq.
Pisariaqartitsisoqarnerarpaa
2022-mi septemberimi nalunaarusiaq Qamani MIO-mit ingerlanneqartoq saqqummerpoq, tassani inuusuttorpassuit siunnersuuteqarput imminortarnermut pitsaaliuineq qanoq ingerlanneqarsinnaanersoq.
Tassanilu peqataasunit tikkuarneqarpoq inuusuttoqatinut ikiuunnissaminnut periusissaasinnaasunik amigaateqarlutik soorlu tarnikkut ikiueqqaarnertut ittunik:
- Inuusuttut ikinngutitik nuanniillioraangata imminornissamulluunniit eqqarsaateqarpata qanoq oqaloqatigisinnaanerinut tunngasunik ilinniartinneqarnissartik kissaatigaat, siunnersuutini ilaatigut taama allaqqasoqarpoq.
Statens Institut for Folkesundhedimiit nalunaarusiap takutippaa Nunatsinni imminoriaraluarsimasut inuusuttut 15 procentii kisimik tarnikkut immikkut ilisimasalimmik oqaloqateqarsimasut. Inuunerminni artorsarfimminni ikinngutiminnut ilaquttaminnullu saaffiginnikkajuttarput.
Suliniutissatta pisariaqartinneqarnera tassuunakkuttaaq takuneqarsinnaareerpoq, Erni Kristiansen oqarpoq.