Suliniut nutaaq meeqqap inuunerani pingaarutilinnut pingasunut sammitinneqarpoq
Paaqqinnittarfiit assigiinngitsut akornanni nuunnerit aamma meeqqat inuuneranni piffiit pitsaanerusumik aaqqissugaassapput, Isumaginninnermut Naalakkersuisoq taama oqarpoq. Meeqqat akornanni atugarissaarnerup qaffanneqarnissaa siunertaavoq.
Isumaginninnermut Naalakkersuisup Martha Abelsenip tusagassiortunik katersortitsinermi nassuiarpaa, meeqqap nuunnerani pitsaanerusumik aaqqissuunneqartassasoq. Periusissatut pilersaaruteqarlunilu angajoqqaanut siunnersuisoqartassaaq, assersuutigalugu meeraq meeraaqqerivimmi aallartileraangat.
- Nuuttarnerit pingaaruteqartorujussuupput, aamma ilaqutariit ukkatarissavagut. Ilaqutariit meeqqamut pingaarnersaapput, Martha Abelsen oqarpoq.
Aammattaaq nunaqarfimmit illoqarfimmut nuuttarneq ukkatarineqassaaq, meeqqat nunaqarfiup atuarfianit illoqarfinni anginerusunut meeqqat atuartut angerlarsimaffiannut nuuttarnerat.
Nuuttarnerit pingasut ukkatarineqarput. Siulleq angerlarsimaffimmit paaqqinnittarfimmut, aappaa meeqqerivimmit atuarfimmut, pingajuattullu meeqqat nunaqarfimmi atuarfimmit illoqarfimmi atuarfimmut nuuttut.
Suliniut Meeqqat 0-18-mik taaguuserneqarpoq.
Kommunini aallartitsineq
Suliniut 2019-imi misiliutitut Avannaata Kommuniani aallartinneqassaaq. Suliniut kingorna kommuninut tamanut atuutilersinneqassaaq.
Suliniutit Namminersorlutik Oqartussanit aallartinneqartut, Namminersorlutik Oqartussani sulisut aallaraangata ingerlalluarunnaartartut, Martha Abelsenip oqaatigaa. Maanna tamanna pissanngilaq.
- Kommunit suliniummik uannga piginnittuunissaat pingaaruteqarpoq. Akisussaaffimmik tigusissapput, suliniummillu ingerlatsinermi qitiusumik suliaqartuussallutik, Martha Abelsen tusagassiortunik katersortitsinermi oqarpoq.
Suliniut Ilulissani eqqanilu nunaqarfinni aallartissaaq.