Suliniut annertooq nutaaq: Timmisartoqarfiup eqqaani talittarfiliorniartoq
Ingerlatseqatigiiffik Disko Bay Seagate Ilulissat timmisartoqarfiata eqqaani talittarfiliorusuppoq. Talittarfik Disko Linep umiarsuaanut tamanut inissaqarlunilu ilaasunut utaqqisarfeqassaaq.
Avannaata Kommuniatnit Ilulissat timmisartoqarfiata eqqaani talittarfiliornissamik qinnuteqaat tusarniaassutigineqarpoq.
Suliniuteqartuuvoq Topas Explorer Group ApS, ilaatigut Disko Linemik piginnittuunermi saniatigut takornariartitseqatigiiffiuteqartoq ilaasunik angallassinissamik Namminersorlutik Oqartussanut arlalinnik isumaqatigiissuteqartoq.
Qinnuteqaat naapertorlugu Disko Linetut ingerlatseqatigiiffiup immikkoortortaqarfia nutaaq Disko Bay Seagate samaartortitsisuussaaq.
Nutaamik talittarfeqalernikkut umiarsuit sisammik sanaajusut talissinnaanissaat qulakkeerneqassaaq:
- Disko Linemit umiarsuaq sisammik sanaajusoq 36 meterisut takitigisoq 2023-mi upernaakkut atuutsinneqalissaaq, angallassisarnissamut Namminersorlutik Oqartussanut ukiuni-qulini atuuttussamik kiffartuussinissamik isumaqatigiissuteqarfigineqarsimasoq. Ilulissani maanna umiarsualivik ulikkaaqqajuaannarmat Disko Linep umiarsuaatai inissaqartanngillat.
Ilaasut utaqqisarfiat, inissiat sannavillu
- Disko Bay Seagate A/S-imit taamaammat kissaatigineqarpoq, Itisuarsummi Dsko Linep umiarsuaataanut tamanut inissalimmik talittarfiliortoqarnissaa, qinnuteqaammi allassimavoq.
Disko Linep umiarsuaataasa inissaqartinneqarnissaasa saniatigut ilaasunut utaqqisarfeqassaaq, Disko Linemi sulisunut inissaqartitsisoqassaaq kiisalu angallatinut sannaveqassalluni.
Suliniummi talittarfissap nutaap tungaanut aqquserniornissaq aamma ilaatinneqarpoq:
Aqqusineq nutaaq
- Timmisartoqarfimmiit talittarfimmut toqqaannaq ingerlasoqartalerneratigut aqqusineq pisariaqanngitsumik artukkerneqaranilu umiarsualivimmi maanna atuuttumi ulapinnerujussuaq oqilisaaffigineqassaaq. Talittarfissaq suliffeqarfissuup ingerlatseqatigiiffiutaannut taamaallaat atugassiaassaaq: Disko Line, Blue Ice Explorer aamma Nuuk Water Taxi, qinnuteqaammi allassimavoq.
Aningaasaqarneq eqqarsaatigalugu, Disko Line Disko Bay Seagatemi ilaasumut ataatsimut akitsuummik 30 koruuniusunik akiliuteqartarpoq, Disko Linemillu nalilerneqarsimavoq, ukiut ilaasut 25.000-it missaanniittut talittarfikkoortinneqartassasut.