Sulinerup nalaani timimik aalatitsineruneq
Ullup suliffiusup ingerlanerani akunnerup affaani timimik aalatitsisarneq ullormi suliffiusumi ilorrisimaarnermik naammassisaqarsinnaassutsimillu pitsanngorsaasinnaavoq. Nunatsinni »unillatsiarnerit timimik aalatitsiviunerusut« immaqa pilersinneqartussanngorput.
Sulinerup nalaani timigissartalernissamik isumassarsiaq politikkikkut tapersersorneqarpoq.
Tamanna napparsimalluni sulinngitsoortarnerup Inatsisartuni oqaluuserineqarnerata kingorna ersarissivoq. Kisianni suliffeqarnermut attuumassuteqartut akuliutitinneqarnissaa pisariaqassaaq, tamannalu akeqanngitsuunavianngilaq, aviisi AG allappoq.
Aningaasaqarnermut Naalakkersuisoqarfimmi naatsorsukkanit takutinneqarpoq, pisortat suliffeqarfiini sulinerup nalaani minutsini 30-ni timigissarneq ukiumut 46 millioner koruunit missaannik akeqassasoq.
- Allanik atisalersornermut, uffarnermut ingerlatanulluunniit attuumassutilinnut allanut piffissaq naatsorsuinermut ilanngunneqanngillat, paasissutissiissutigineqarpoq. Isumassarsiaq Demokraatinit sapaatip-akunnerani kingullermi saqqummiunneqarpoq.
- Nalunngilarput timimik aalatitsinerup napparsimalernissamut aarlerinaat annikillisittaraa kiisalu timikkut tarnikkullu peqqissuuneq pitsanngoriartittaraa. Ullumikkut inuppassuit inooriaaseq tunngavigalugit nappaatinit eqqugaasarput. Inooriaaseq tunngavigalugu nappaatinik pitsaaliuinerit pitsaarnersaat tassaavoq timigissarneq, Anna Wangenheim erseqqissaavoq.
40 millioner koruunit sinnerlugit akeqarnissaata qaffasinnera ilumoornerarpaa.
Kisianni: - Sulinerup nalaani timigissarnerup pitsaasunik sunik sunniuteqarnissaa naatsorsuusiorneqarsimanngilaq, apeqquteqaat tunngavigalugu oqallisissiamut saqqummiussami allappoq.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: