Skip to main content

Sulinermi ilanngaatip atuutsinneqalernissaa sulissutigeqqinneqalersoq

Naalakkersuisut inatsimmik, isertitakitsut akunnattumillu isertitallit sulinermi ilanngaateqarsinnaanerannik qulakkeerinnittussamik, atuutsitsilerniarlutik sorsuuteqarnertik unitsinnianngilaat. Tamanna allannguutissatut siunnersuummi nutaami takuneqarsinnaavoq, neriuutigineqarpoq siunnersuut Akileraartarnermut Ataatsimiititaliamit akuersaarneqassasoq

Naalakkersuisut oktobarip 16-iani Akileraartarnermut Ataatsimiititaliamit ilisimatinneqarput, ilanngaateqarnermi iluanaarutip ukiup tulliani akileraarutigisimasanik naatorsuinermut atatillugu aatsaat tunniunneqartarnissaanik aaqqissuussisimaneq ilalerneqarsinnaanngitsoq.

Aamma professorip Aningaasaqarnermullu Siunnersuisoqatigiinni siulittaasup Torben M. Andersenip taamatut aaqqissuussisimaneq, sulisartut maannakkut sulinerminni aningaasatigut iluaqutigisinnaanngippassuk qularnartoqartissimavaa.

It-kkut atortorissaarutit piareersarneqassasut

Ullualuit matuma siorna Akileraartarnermut Naalakkersuisoq Vittus Qujaukitsoq allannguutissatut siunnersuummik saqqummiussivoq, tassani aallaqqaammut siunnersuutigisimasani ukiortaamiit atuutsinneqalersussasq atuutsiinnarpaa, ilassutigaluguli ilanngaat ukiumut ataasiarluni tunniunneqartarani qaammatit tamaasa siumoortumik tunniunneqartartussanngorlugu Akileraartarnermut Aqutsisoqarfik it-kkut atortumik iluarseeqqullugu piumaffigineqarsimasoq.

Vittus Qujaukitsup taamaalilluni uppernarsarpaa, ukiumut ataasiarluni kingusinaartumik tunniussisarnissamik siunnersuut siulleq atorneqarsinnaanngitsoq. Inatsisissarli Ukiakkut katersuunnermi matumani inissikkusuppaa, Akileraartarnermut Aqutsisoqarfiup ilanngaatitigut iluanaarutissaq sulisartunut ataasiakkaanut siumoortumik tunniussinnaalerpagu inatsimmik nutaamik atuutsitsilernissamut piginnaatinneqarniassagami.

Imatut ingerlanneqassaaq

Vittus Qujaukitsoq siunissami najoqqutassaq pillugu imatut ilisimatitsivoq:

- Akileraartarnermut Aqutsisoqarfimmit isertitat il. il. pillugit paasissutissat tiguneqarneranni qaammatit marluk qaangiukkaangata sulinermi ilanngaat siumoortumik tunniunneqartassaaq. Tassa assersuutigalugu januaarip qaammataani A-isertitanit sulinermi ilanngaat marsip qaammataani tunniunneqartassaaq, februaarillu qaammataani A-isertitanit sulinermi ilanngaat apriilip qaammataani tunniunneqartarluni ilaalu ilanngullugit.

Isertitat ukiup tulliani nalimmassarneqarnerannut atatillugu inaarutaasumik naatsorsuisoqartassaaq. Sulinermi ilanngaat annikinaaarlugu pisimagaanni akileraarutinit utertoorutinut ilanngullugit tunniunneqartassapput. Pisassalli sinnerlugit pisimagaanni 8 procentimik ernialerlugit akileraarutit qaavisigut akiligassiissutigineqartassallutik.

IT-mut aningaasartuutit qanoq annertutigineri ilisimaneqanngitsut

Vittus Qujaukitsup ilisimatitsissutigaa, najoqqutassaq nutaaq Akileraartarnermut Aqutsisoqarfiup IT-kkut atortorissaarutaanik ineriartortitsinermi millioninik qanoq annertutigisunik naleqassanersoq ilisimaneqanngitsoq, aamma najoqqutassaq “sulisitsisut A-akileraarutinik naatsorsuisarnerannut allannguuteqartitsinissaa naatsorsuutigineqarmat” sulisitsisunut sunniuteqassangatinneqarpoq.

Akileraartarnermut Ataatsimiititaliaq Inatsisartunilu ilaasortat sinnerit atortorissaarutit IT-kkut ineriartortinneqarnissaannut annertussusileriigaanngisumik aningaasaliissuteqarusussanersut paasinarsissaaq, allannguutissatut siunnersuutip novembarip 14-iani aappassaaneerlugu suliarineqarneranir.

Sulinermi ilanngaat pillugu aallaqqaammut inatsisissatut siunnersuummi Nunatta Karsianut ukiumut 50 millioner koruuninik naleqartartussatut naatsorsuutigineqarsimavoq. Allannguutissatut siunnersuut akuerineqassappat, 50 millioner koruunit taakku kingusinaartumik tunniunneqarnerat pissutaalluni 2021-mut aningaasanut inatsimmut aatsaat sunniuteqassapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER