Sulinermi ajoqusernerit: Suliffinni pissusissanik malinnilluarput

Sanaartornerujussuaq sulisut amerlanerusut sulinermi ajoqusernerannik kinguneqarsimagunanngilaq. Sammisaqarfinni allani aamma taamaappoq.

Ukiuni kingullerni sanaartorneq annertuseriarujussuaraluartoq sulinermi ajunaarnerit ajoqusernerillu qujanartumik amerleriarsimanngillat.

Ukiuni makkunani pingaartumik Nuummi qaartiterisoqarlunilu sanaartortoqaqaaq, aviisi AG allappoq.

Illoqarfiit pingaarnersaanni Ilulissanilu mittarfiliornerit suliffeqarfiupput sulinermi isumannaatsuunissaq nakkutiginngikkaanni sulinermi ajutoornissamut annertuumik ulorianartorsiorfiusut.

Pingaartumik sanaartortoqarnerulerneratigut qujanartumik sulisartunik amerlanerusunik ajoqusertoqartarsimagunanngilaq, Kalaallit Nunaanni Sulinermi Ajoqusernernut Centeri paasissutissiivoq.


- Ukiunut siuliinut sanilliullugu allaanerussuteqarneranik takunngilagut. Sulinermi ajoqusertartut amerlassusiat aalajaatsorujussuuvoq, Sulinermi Ajoqusernernut Centerimi pisortaq Henrik Soloy oqarpoq.

Taanna paasissutissiivoq ukiumut sulinermi ajoqusertut 1000-t missaanniittut nalunaarutigineqartartut. Ukioq manna tikillugu nalunaarutigineeqartut 600-uupput, taamaattumik 2021-imi ajoqusertut ukiumut agguaqatigiissillugu ajoqusertartutut amerlatigerpasipput.

Aalisartut piniartullu

Qularnanngivissumik nalunaarutigineqartartunit amerlanerusunik sulinerminni ajoqusertartut tassaapput aalisartut piniartullu.

- Aalisartut piniartullu allaanerussuteqarput. Kikkummi tamaasa kajumissaartarpavut ajoqusernerit nalunaarutigisaqqullugit, takusinnaavarpulli nalunaarutiginnittartut amerlanngitsut, Henrik Soloy oqarpoq.

Allaaserisaq tamaat uani AG-mi pisiarisinnaasanni atuaruk:

Powered by Labrador CMS