Skip to main content

Sulineq tamatigut akilersinnaassaaq

Qineqqusaarneq aallarteruttorpoq aningaasaqarnikkulli iluarsaaqqinnissamik siunnersuutit tigussaasut killeqaqaat.

Inuit Ataqatigiit sinnerlugit qinigassanngortittup Aaja Chemnitz Larsenip innersuussutigaa pisortanit ikiorsiissutit pillugit inatsisit misissorneqassasoq sulinerlu kajuminnarnerusunngortinneqarluni. Ullumikkut sulisinnaasut 40 procentii SIK malillugu akissarsiat minnerpaaffiinit appasinnerusunik isertitaqartarput. Aamma akileraartarnermut atugarissaarnermullu ataatsimiititaliarsuup misissuinerata takutippaa pisortanit ikiorsiissutinik pisarneq SIK malillugu akissarsiat minnerpaaffissaannik akissarsisarnermit akilersinnaanerusoq.

– Sulineq akilersinnaajuartariaqarpoq eqqortuusinnaanngilarlu suliaqarani pilersorneqaannarnerup akilersinnaanerunissaa, Aaja Chemnitz Larsen oqarpoq nangillunilu:

– Pissutsit taamaattut inuiaqatigiit akissaqartinngilaat. Pisortanik ikiorsiissutit pillugit inatsisip allanngortinnissaa misissortariaqarparput paasiniarlutigulu qanoq iliornikkut sulineq kajuminnarnerulersinnaanersoq.

Akileraartarnermut atugarissaarnermullu ataatsimiititaliarsuup misissuinerisa takutippaat 2009-mi inuit ikiorsiissutinik pissarsisimasut 20 procentii angullugit nammineq pilersornissaminnut akissaqartut, ilaquariillu ilaat inoqutigiinni 600.000 koruuninik isertitaqartartut pisortanit ikiorsiissutisisartut. Pisortanit ikiorsiissutinik inatsimmi missiliuussilluni naliliinissaq periarfissaavoq sullissisullu ataasiakkaat suliani ataasiakkaani nalilersuisarlutik.

– Taamatut ingerlaannarnissaq inuiaqatigiit akissaqartinngilaat. Pisortanit ikiorsiissutit inunnut imminnut pilersorsinnaanngitsunut pilersornissaminnullu periarfissaqanngitsunut atorneqartariaqarput. Aaja Chemnitz Larsen isumaqarpoq suliffissaaleqineq siunissaq ungasissoq isigalugu akiorneqartariaqartoq isumaqarlunilu ilinniartitaanerup qaffassarneratigut namminersortullu siuariartornissamut periarfisinnerisigut tamanna pisinnaasoq.

– Isumaqarpunga inuit ataasiakkaat suliaqarnissartik pilersueqataanissartillu pissusissamisoortutut isigigaat. Inuit ataasiakkaat inuiaqatigiillu marloriaammik pissarsissutigissavaat inuit suliaqaratik pilersorneqarneranniit sulilernissaannut aqqutissiuukkutsigik, taanna oqarpoq.

Nalilerneqarpoq sulisinnaasut 62 procentii ilinniagaqarsimanngitsuusut suliffissarsiortullu 90 procentii ilinniagaqarsimasuunatik.

2013-imi pisortanit ikiorsiissutit 156 million koruunit atorneqarsimapput.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER