isumaqatigiinngissut

Suliffissarsiortunut ikiorsiissutissat paasiuminaallisitsivoq

Namminersorlutik Oqartussat aamma Qeqqata Kommunia suliffissarsiortut sulilersinniarlugit suliniummut akissarsiassat isumaqatigiinngissutigisimavaat. Isumaqatigiinnginnerat missingersuutini suliffissaaleqinermut annikillisaasussamut ajorsititsivoq

Sisimiut

Aningaasat suliffissarsiortunut suliffeqalersitsinissamut atorneqartussaagaluit uninngatiinnarneqarsimannguatsiarput. Qeqqata Kommunianut kukkunersiuisut attuumassuteqanngitsut, suliffissaaleqineq pillugu tapiissutit immikkut ittut misissoramikkit taakku naammattoorpaat.

Tamanna kukkunersiusut nalunaarutaanni kingullermi, 2015-mut atuuttumi takuneqarsinnaavoq. Tassani BDO Revisionip tikkuarpaa, kommuni Namminersorlutik Oqartussallu 4,8 millionit koruunit suliffissaaleqisunut iluaqutissatut atorniarlugit siorna isumaqatigiissutigisimagaat.

Taakkunannga kommuni 1,2 millionit koruuninik tapeeqataasussaagaluarpoq. Kukkunersiuisulli missingersuutit misissoramikkit taamaattoqanngilaq.

Atuaruk: Sisimiuni illoqarfittaap aqquserngi atserneqarput

Amigartumik iliuuseqaratartoqarsinnaasoq
- Suliniutit aallartinneqartut qimerloorneranni nalilerparput, suliffissaaleqinermut immikkut atugassat tamakkiisumik atorneqanngitsoorsinnaanerat. Kukkunersiusut piffissami pulaarfianni kommunip tapiissutissai 1,2 millionit koruunit naatsorsuutinut allanneqarsimannginnerannik tamanna pissuteqarpoq, taamatullu suliniutit ataasiakkaat aallartinneqarsimanngimmata, kukkunersiuisut malugeqqusipput.

Atuaruk: Angajoqqaanngorlaanut tunniuttakkat tukattoqaqisut

Sisimiuni suliniutinik amigaateqartoqartoq
Akissuteqarluni oqaaseqaammi inuussutissarsiornermut aamma suliffeqarnermut ataatsimiititaliami politikerit nassuiarpaat, Maniitsumi suliffissarsiortunut suliniutit naammassineqarsimasut. Sisimiunili taamaaliortoqarsimanngitsoq.

- Kukkunersiusut 2015-ip ingerlanerani Qeqqata Kommunia pulaaramikku, aningaasartuutinut naatsorsuutinut nalunaarutit tunngavigalugit, suliffissarsiortunut iliuusissamut pilersaarummi suliniutit Sisimiuni aallartinneqarsimarpasinngillat. Tamanna kisianni Qeqqata Akademi aamma Qeqqata Kommuniani Namminersorlutik Oqartussallu akornanni sulisut akissarsitinneqarnissaat pillugit isumaqatigiinngissuteqarnerannik pissuteqarpoq, inuussutissarsiornermut aamma suliffeqarnermut ataatsimiititaliami politikerit nassuiaapput.

Atuaruk: Kommunimi politikerit marloriaammik akissarsisarsimapput

Sapaatip akunnera suliffiusoq kukkusaq
Kukkunersiuisut eqqumiitsorsiaat alla tassaavoq, erninerup kingorna ullormusiani tamani kukkusoqarsimasoq.

- Kukkusumik aningaasarsitsitsinermut pissutaaneruvoq, erninnginnermi akunnerit suliffiusut (erninerup kingorna ullormusianut tunngaviusut) kukkusumik naatsorsorneqarnerat, kiisalu allaffeqarfiup ullut suliffiusut aningaasarsititsinermut tunngatillugu arfineq-marluk, tallimaanngitsut atorsimagamikkit, kukkunersiuisut paasititsipput.

Qeqqata Kommuniata ilisimatitsissutiginikuuaa, sapaatip akunneranik suliffiusumik naatsorsuisarnertik kukkusoq allanngortinniarlugu.

Atuaruk: Utoqqalinersiallit amerlavallaanik tunineqartarsimapput

Powered by Labrador CMS