suliffissaaleqineq
Suliffissaaleqisut ikiliartorput
Naatsorsueqqissaartarfimmit kisitsisit nutaat takutippaat, suliffissaaleqineq siornamut qaammammut tassunga sanilliullugu annikinneruvoq
2016-imi marsimi suliffissarsiortutut nalunaarsukkat 3.241-inik amerlassuseqarput, taakkunannga 468-it nunaqarfinniillutik. Ukiup siuliani qaammat januaarimut sanilliullugu katillugit 712-inik ikinnerupput, nunaqarfinnilu suliffissarsiortut ikileriarnerat inunnik 568-inik amerlassuseqarput.
Nunatsinni Naatsorsueqqissaartarfimmit kisitsisit saqqummertut tamanna takutippaat.
Atuaruk: Nunatsinni suliffissaaleqisut suli ikiliartorput
Kisitsisit aamma takutippaat angutit qaammatit suliffissarsiortutut nalunaarfigisimasaat allannguuteqarpallaanngitsut, arnalli qaammatini qulit aqqaneq-marlullu akornanni suliffissarsiortutut nalunaartarsimasut agguaqatigiissinneranni ikinnerusimapput.
Amerlanerusut suliffittaartarput
2015-imi kvartalit aappaannit 2016-imi kvartalimut siullermut inuit 8.851-it qaammammi ataatsimi arlalinniluunniit suliffissarsiortutut nalunaarsorneqarsimapput, ukiumut siulianut piffissap tamatuma assingani inuit 9.408-t suliffissarsiortuusimapput.
2015-imi kvartalit aappaannit 2016-imi kvartalimut siullermut suliffissarsiortut 49,6 procentii, katillugu inuit 4.394-it, qaammammi ataatsimit pingasut tungaanut nalunaarsorneqarsimapput, 11,2 procentiilu, imaluunniit inuit 988-it qaammatini qulini aqqaneq-marlunni suliffissarsiortutut nalunaarsorneqarsimapput.
Kisitsineq
Suliffissarsiortut nalunaarsorneqarsimasut inuit kommunimut suliffissaaleqinermik ajornartorsiuteqarlutik saaffiginnittut kisinneqarnerisigut naatsorsugaapput.
Inuk ataaseq qaammammi ataatsimi suliffissarsiortutut nalunaarsorneqartarpoq, qanorluunniit ulloq ataasinnaq qaammat tamakkerluguluunnit suliffissarsiorsimaguni.