piumasaqaatit

Suliffissaaleqisunut piumasaqaatit annertunerit

Suliffissaaleqisut aalisakkanik suliffissuarni suliumanngitsut pisortanit ikiorsiissutinik pisassanngillat, Karl-Kristian Kruse isumaqarpoq

Karl-Kristian Kruse
Aalisarnermut naalakkersuisoq Karl-Kristian Kruse, Siumut

Aalisarnermit isertitanik amerlanernik pissarsiniarluni tamaviaarluni sulisoqaraluartoq aalisarnermut naalakkersuisoq Karl-Kristian Kruse isumaqarpoq suliffissaaleqisut aalisarnermik inuussutissarsiummut annertuumik unammilligassaasut.

Aalisakkat iluaqutigalugit aningaasanik isaatitsiniaraluarnitsinni illuatungaatigut nunatsinni suliffissaaleqisorpassuit Aalisarnermut naalakkersuisup unammilligassatut annertuutut isigai.

- Aalisakkerivinni sulisussaaleqineq annertusiartuinnarpoq. Aalisagaqarnerput inuiaqatigiinni suliffissaqartitsinerulernermik pilersitsiniartussaagaluartoq illuatungaatigut suliffissaaleqisorpassuit fabrikkini suliumanngillat, tamanna aalisakkerinerup tungaatigut sukkanerusumik ineriartornissaraluatsinnik kigaallatsitsivoq, oqarpoq.

Aalisarnermik naalakkersuisoq Karl Kristian Kruse isumaqarpoq, suliffissaaleqinermut tunngatillugu kommunep inatsisitigut aaqqissugaanera sukaterneqartariaqartoq.

- Inuit peqqissut sulisinnaasariaqarput, ullumikkut ajornanngippallaamik naaggaarsinnaallutalu piumanngissinnaanerput atuuppallaaqaaq, akerlianillu pisortanit ikiorsiissutinik pisartagaqarneq ajornanngeqaluni. Sulisussaqassaguttalu avataaniit sulisussanik tikisitsiortortariaqalissaagut, akerlianik kalaaleqatigut suliffissaaleqigaluarlutik aalisakkerivinni suliamanngitsut. Sulisussaaleqineq suliffissaaleqinerlu piumasaqarfiusumik aalajangiiffigineqartariaqarpoq, Aalisarnermut naalakkersuisoq oqarpoq.

Allaaserineqartoq Sermitsiami saqqummeqqammersumi atuarneqarsinnaavoq. Aviisi ataani aamma pisiarineqarsinnaavoq:

Powered by Labrador CMS