Skip to main content

Suliffeqarfinnut aarlerinartorsiortunut ataatsimoortumik ikiorsiissutissaat piariingajalersoq

Suliffeqarfiit coronavirus pissutigalugu ingerlanerliulersinnaasut matuinnarnissamillu aarlerinartorsiortut ikiorsiissutissaqartinnissaat pillugu Sulisitsisut Namminersorlutillu Oqartussat ataasinngormat pitsaasumik ataatsimiissimapput.

Suliffeqarfiit akiliisinnaajunnaarlutik matooralinnginnissaat anguniarlugu – pingaartumik takornarialerinerup iluani, takornariat nunamut tikissinnaajunnaarnikuunerat pissutigalugu – ikiorsiissutissanik ataatsimoortunik tunniunneqarsinnaasunik Inuussutissarsiornermut aningaasaqarnermullu naalakkersuisoqarfiit piaartumik suliaqarput.

Sermitsiaq.AG-p allaaserisani arlalinni saqqummiutereerpai takornarialerisut, neriniartarfiit akunnittarfiillu isertitakillilereersimasut, taamatullu neriniartarfik ataaseq matoreersimasoq. Suliffiit arlallit aarlerinartorsiorfiupput, sulisullu nalorninartorsiornerat pissutigalugu angerlarsimaffippassuarni ernumasoqarpoq.

Vækstfondenimiit aningaasat

Savalimmiuni lagmandi ataasinngormat nalunaarutigisinnaalerpaa danskit naalagaaffiannit Vækstfonden piffissami akiliisinnaanermut ilungersunartorsiorfiusuni aningaasanik atornissamut pitsaasunik periarfissaqartitsisoq.

Apeqqutaaginnalerpoq Vækstfonden Kalaallit Nunaannut aamma ikiuuteqassanersoq, naalagaaffiup iluani immikkoortitsissanngikkuni.

Sulisitsisut pisortaata Brian Buus Pedersen Namminersorlutik Oqartussat qanoq ikiuigasuassanersut pillugit ilisimasaqanngilaq.

- Naalakkersuisoqarfiilli marluk ullumi ataatsimeeqatigisatta suliaq pimoorullugu suliarimmassuk nuannerpoq. Ikiorsiissutillu inissilertornissaat aatsaat taama pingaaruteqartigaaq, suliffeqarfiimmi ilaat eqqugaangaatsiareerput, Brian Buus Pedersen Sermitsiaq.AG-mut ilisimatitsivoq.

Politikkikkut akuerineqassaaq

Naalakkersuisut marlunngornermi ilisimatitsisinnaanngillat ikiuigasuarnissap imai suussanersut. Inuussutissarsiornerulli iluani ikiuigasuarnissamik suliat aamma suliffeqarnerup iluani ikiuigasuarnissamut suliat akuerineqartinnagit mikisualuit pillugit Naalakkersuisut saqqummiussiumaarput.

Inuussutissarsiorgiit inuiaqatigiillu ilisimatinnginnerini Naalakkersuisut suliaat Akileraartarnermut Aningaasaqarnermullu ataatsimiititaliamit akuerineqaqqaartussaapput.​​​​​​​

Takornarialerisut, akunnittarfiit neriniartarfiillu kisimik unammilligassaqanngillat. Aatsitassarsiornerup iluani nalit appapiloorneri aamma malugineqarput. Tamanna isumaqarpoq aningaasaleerusuttut tunuarsimaarnerulernerat. Kalaallit Nunaanni aatsitassarsiornerup iluani suliassat arlallit siunissaat qaamagisassaanngikkallarpoq, suliffeqarfiit aatsitassarsiortussat pisariaqartumik aningaasaliiffigineqanngippata.​​​​​​​

Piaartumik iliuuseqartoqartariaqarpoq

- Suliassaqarfiit immikkut ilisimasalinnik nunanit allaneersunit tikisitsinissamut unammilligassaqarput, nunat killii matuneqarmata, nunarsuarmilu angallannerup killeqarnerulernera pissutigalugit, Brian Buus Pedersen erseqqissaavoq.

- Pisumi piaartumik iliuuseqartariaqarpugut. Ullumikkuusariaqarpoq aqaguunani. Erseqqissarusupparali Naalakkersuisunik oqaloqateqarnerput pitsaalluinnartuummat. Paaseqatigiippugut inuiaqatigiinni annertuumik ajornartorsiortoqalissasoq, tamannalu aaqqittariaqaripput, Sulisitsisut pisortaat erseqqissaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER