Suliffeqarfimmi immikkut ilisimasat sullissinerlu pitsaasoq
Arnbjørn Olsenip ingerlatani Hvidevareteknik nalaatsortumik aallarnerneqartoq, ulluni makkunani ukiunik qulinngortorsiorluni nalliuttorsiutigisinnaavaa
Nuukullaap aallartilaarfiani toqqoqqalluarluni Hvidevareteknik inissisimavoq, tassaniillutillu Savalimmiormiu Arnbjørn Olsen sulisuilu pingasut-sisamat. Arnbjørn ukiut qulit ingerlanerini Nuummi iggavimmi errorsinermilu atortunik pilersuillunilu sullissisarsimavoq aamma tamatumunnga atatillugu suliassat annertuallaaratillu mikivallaartarsimanngillat. Suliassanik immikkut ittunik pussukinnartunik soorlu radiunik, pinnguaatinik aningaasanik nakkartitsisarfinnik assigisaanillu aamma sullissisarpoq. Taamaattorli nassuerutigalugu mersorfiit kakkannerpaaffigilernaviarnagit.
Akunnaalliliineq nalliussineqartoq
Suliffeqarfiup sapaatip-akunnerani matumani ukiunik qulinngortorsiornerminut atatillugu arlalinnik neqerooruteqarpoq. Pisisartut ikinngutillu ilasseqatigiinnissamut aamma aggersarneqarput taamaalilluni ulloq malunnartinniarneqassalluni. Naapisimaartarneq pisunillu immikkut ittuni ulluinnarnilu nalliuttorsiutiginnittarneq Arnbjørnimut takornartaanngillat. Arfininngornerit tamaasa allaffia inoqarluartarpoq, tassami Savalimmiormiut illoqarfimmiittut persuarsiornanngitsumik naapisimaartaramik oqaloqatigeerujoorlutillu.
- Qujanartumik arlariikkajuttarput, taamalu imminnut aliikkusersorsinnaasarlutik, taamaalillungami tunuatungaanut pillunga suliaqalaarsinnaasarama, Arnbjørn Olsen qungujulaarluni oqarpoq.
Misilittagaqarluartoq
Arnbjørn Nuummi angerlarsimaffeqarpoq tamaaniiginnassallunilu. Illoqarfimmut 1986-imi nuuppoq, tassa Savalimmiut avataanni allamik misilitaqarusulluni. Sivisunerusumik maaniinnissani pilersaarutigisimanngikkaluarpaa, taavali illoqarfik aamma maanna nuliani, Vera-Lise asannilersoorfigai, nulianilu maanna sisamanik qitornaqarput. Nunamut aggerfimminut arlaanni uternissaminik takorluugaqanngilaq, maanimi ilaqutaqarami, suliffiuteqarluni maanilu inuuneq sungiusimallugu.
Nalaatsortumik namminersortunngortoq
Hvidevareteknik Nota Benep kingorna pilersinneqarpoq. Arnbjørn tassani sulisuusimavoq, niuertarfiulli iggavimmi errorsinermilu atortunik tuniniaanini taamaatikkiartuaarniarlugu aalajangermat, suleqatini peqatigalugu suliffeqarfimmik pilersitsinissani aalajangiussimallugu. Ukiut aappaata affaani ingerlatereerlugu paasivaat, Arnbjørnip pisiniarfik kisimiilluni ingerlatilerpagu pitsaanerussasoq, taamanimiilli suliffeqarfik kisimi piginnittutut ingerlatilerlugu.
Toqqagassarpassualik
Pisiniarfik aqqusernup sinaani pisiniarfiit akornanniinngilaq. Taamaattumik Hvidevareteknikip quersuaanut iserluni tupaallannalaanngitsuunngilaq. Iggavimmi errorsinermilu atortut aamma sillimmatissat amerlalluinnarnerat tupaallaatissaavoq. Arnbjørnip quia assassornermit suliaqartunit allanit sillimmatissanut assigiinngitsunut aamma atorneqartarpoq, namminneq quimiititassanut annertuallaartunut toqqorsivigisaramikku. Pisiniarfik aamma amerlasuunik quimiittuuteqarpoq, Arnbjørnimmi arlaleriarluni errorsiviit, kissarsuutit assigisaalu 15-it sinnerlugit amerlassusillit sukkasuumik tikisissinnaasarsimavai.
Aallaqqaataanniit naggataanut sullissineq
Arnbjørnip sullissinerup qaffasissusissaa pingaartittuaannarsimavaa. Tassungami pisiniarnermi akitsuutinik isertuussanik tupaallannartunillu allanik naammattuugassaqanngilaq. Soorlu kissarsuummik pisigaanni niueqatigiinneq aatsaat naammassineqassaaq taanna angerlarsimaffimmut tunniunneqareerpat ikkussuunneqareerpallu. Kiffartuussinerup qaffasissusia tamannarpiaq pissutigalugu suliffeqarfik ingerlalluaqaaq. Arnbjørn nammineq 60-ileeqqammerpoq, aamma soorunami ukiuni tulliuttuni qulini iggavimmi errorsinermilu atortunik allanillu elektronikinik Nuummi sullissinissaminut piareersimalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...