Skip to main content

Suliffeqarfik 100.000 koruuninik tunissuteqartoq – atisanik katersineq aallartinneqarpoq

Nuugaatsiarmiut angerlarsimaffeerussimasut qimarngunneqarsimasulli kalaaleqatiminnit ilisarisimanngisaminnit ikiorserneqalerput. Suliffeqarfik Sanningasoq Aappaluttumut 100.000 koruuninik tunissuteqareersimavoq.

Sanningasoq Aappaluttoq Nuugaatsiami innuttaasut ajunaarnersuarmik eqqugaasimasunut katersuiniartitsilluni aaqqissuussivoq.

Illoqarfinni arlalinni Nuugaatsiami inuttaasunut atisassaanik katersuiarniarlutik aallartereersimapput. Atisanik katersiniarlutik suliniuteqartut ilagaat Maniitsumi qatserisartut.

Kaammattuut

Morten Siegstad Maniitsumi inuttaasut katersuiniarnermut peqataaqqullugit Facebookimi kaammattuivoq.

- Ikiuerusuttut 813613 atorlugu sianerpata, iikiuutissanik aallersinnaavugut, Morten Siegstad Facebookimi taama allappoq.

Royal Arctic Line containerinik atukkiusserusuttoq

Uummannap sulluani eqqugaasunut katersuiniarnerit illoqarfinni arlalinni ingerlanneqaleruttorput. Taamaattumik Royal Arctic Linemiit illoqarfinni umiarsualiveqarfiusuni innuttaasut katersuiffissaannik containerinik atukkiusserusuppoq. Paasissutissat annertunerusut pineqarsinnaapput attaveqatigiinnermut ussassaarinermullu pisortaq, Ann-Britta A. Olsvig attavigalugu uunga abr@ral.gl, suliffeqarfik Facebookimini taama allappoq.

100.000 koruunit

Taamatuttaaq pisortaanerup Frans Heilmanip Sermitsiaq.AG-mut paasissutissiisimavoq, Polar Seafoodip Nuummi ingerlatseqatigiiffia Sigguk nunaqarfiup inuttaasuinut 100.000 koruuninik tunissuteqarniartoq.

- Sanningasoq Aappaluttoq aningaasanik tunissuteqarfiginiarlugu massakkut aaqqissuusseqatigaakka, Frans Heilmann paasissutissiivoq. Taassuma paasissutissiaraa suliffeqarfik piffimmi eqqugaasumi arlalinnit aningaasaliisartoqarluni.

Taassuma neriuutigaa suliffeqarfiit allat aamma aningaasanik tunissuteqarumaartut, taamaasiornikkummi qimarngunneqarsimasut sukkanerpaamik toqqissisimasumik inuuniaqqilersinnaanissaat anguneqassammat.

Sanningasoq Aappaluttoq: Aningaasanik tunissuteqarfigineqarsimavugut

Sanningasoq Aappaluttumi siulittaasup, Christina Tønder Bellip Sermitsiaq.AG-mut paasissutissiaraa Sigguk A/S-mit aningaasanik tigusaqarsimallutik. Taassuma ilanngullugu paasissutissiaraa Grønlandsbankip Sanningasoq Aappaluttoq suleqatigalugu aaqqissuussaqarsimasut.

- Kikkut tamarmik aningaasanik tapersersuisinnaapput, tamatuma kingorna upalungaarsimanermik oqartussat ajunaarnersuarmit eqqugaasut suut pisariaqartinneraat aaqqissuusseqarfigissavarput, siulittaasoq paasissutissiivoq, suliffeqarfiillu uunga mailersinnaasut tikkuullugit: formand@krk.gl.

Allaaserisap uuma saqqummiunneqarnerata kinguninngiaq Kujataaniit Sermitsiaq.AG nalunaarummik ima ittumik tigusaqarpoq:

- Seekon Radio Qaqortoq 20.000 koruuninik tunissuteqarpoq taamatullu Kujataani kajumissutsimik suliaqarluni katersuiniartoqarnissaa sulissutigineqarluni, Kent Nielsen aamma Hans-Peter N. Bay paasissutissiipput.

Nuummi Sanningasoq Aappaluttup immikkoortortaqarfia ikiuukkusuttorpassuillu katersortarfimmi atisanik katersuiniartut, Sanningasoq Aappaluttup Nuummi immikkoortortaqarfiani siulittaasoq, Malene Lynge paasissutissiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER