Suliffeqarfiit sanaartornermik ingerlatsisut suliassanik itigartitsisariaqartartut
Nunatsinni sanaartornermik ingerlataqartuni sulisussanik amigaateqarnerujussuup kinguneranik, suliffeqarfiit sanaartornermik ingerlataqartut sanaartugassatut pilersaarutinut neqerooruteqarneq ajorput. Tamanna aamma ilaatigut suliffeqarfimmut sanaartortitsisartumut MT Højgaardimut atuuppoq.
Nunatsinni aningaasarsiornerup qaffakkiartulersinnaasutut isikkoqalernera, Nunatsinni amerlaqisunit nuannaarutigineqarpoq, tamatumami kinguneranik suliffiit amerlanerusut pilersinneqarsinnaassammata.
Namminersorlutik Oqartussat, kommunit namminersortullu sanaartornissaminnut piareersimapput, mittarfinniit inissianut, atuarfiit, paaqqinnittarfiit, akunnittarfiit takornarianullu misigisassarsiorfiit sanaartorniarneqarlutik, Sermitsiaq allappoq.
Sanaartortitsisulli, ilaatigut Namminersorlutik Oqartussat pilersaarutiminnik aallartitsisinnaanissartik annerujartuinnartumik ajornakusoortittalerpaat. Sulisussaaleqineq ima angitigaaq suliffeqarfiit sanaartornermik ingerlataqartut suliassanik akuttunngitsumik itigartitsisariaqartarlutik.
Sanaartugassatut pilersaarutit arlallit piviusunngunngitsoortarput. Tamannalu ineriartortitsinermut kigaalaqutaavoq.
- Qaqutigoortuunngitsumik sanaartugassanik suliassinneqartartut suliffeqarfiillu assassornermik ingerlataqartut sulisussanik amigaateqarnertik pissutigalugu, suliassanut sanaartugassatullu pilersaarutinut neqerooruteqarneq ajorput, Sulisitsisuni allaffeqarfimmi pisortaq Karsten Lyberth-Klausen oqarpoq.
Assersuutigalugu Namminersorlutik Oqartussat Blok 1-ip Nuuk Centerip sanianiittup isaterneqarnissaa marloriarlutik suliariumannittussarsiuuppaat, mamannamullu isaterneqarsinnaanngikkallarluni. Blokki pineqartoq Nuuk Centerip allineqarfissaata nalaaniippoq.
Allaaserineqartoq aviisimi Sermitsiami atuaruk. Aviisi uani pisiariuk: