nussuineq

Suliffeqarfiit nussorneqarnerinut Asii akerliuvoq

- Pisortat suliffeqarfiutaat Nuummiit kommunit sinnerinut nussornissaannut Nunarput akissaqanngilaq, IA-meersoq borgmesteri Asii Chemnitz Narup naqissusiivoq.

Pisortani atorfiit nutaat kommunit sinnerinut inissinneqarlik, Kommuneqarfik Sermersuumi borgmesteri Asii Chemnitz Narup Kim Kielsenimut kajumissaarivoq

Nalunaarutaa amerlasuut tupaallaatiginavianngilaat, tassami borgmesterip maanna Kommuneqarfik Sermersuumi pisortani sulisorisat ilungersuutigisussaagamigit, tamatumalu kommuni akileraarutigigut pingaarutilimmik qulakkeermagu.

Oqariartuutaa
Taarsiullugu pisortani atorfiit nutaat inissinneqarnissaat ukkatarineqartariaqartoq taassuma oqariartuutigaa.

- Kim Kielsen kajumissaarniarpara suliffeqarfissanik suliniutinllu nutaanik sinerissamut inissinneqartussanik sulissuteqaqqullugu. Taamaasiornissaq isumaqarnerujussuussaaq, tassami naqqaaniit suut tamaasa inerisarneqalissagaluarmata, borgmesteri siunnersuuteqarpoq.

- Nunarujussuugaluarpugut, kisianni inukitsuararsuuvugut. Ukiuni arlaqalersuni aningaasarpassuit takorlooruminaatsut atorsimavavut kommunit ikilisarniarlugit allaffissornerujussuarlu annikillisinniarlugu. Maanna kommunit amerliseqqinneqalerput, suliassat allaffissornerlu avammut siarmarneqaqqinnialerpoq. Isumaga naapertorlugu ineriartorneq, utertinneqarsinnaanngitsoq, kingumut utertinniarsarineqarpoq. Taama pisoqassappat inernerissavaa uagut inuiaqatigiittut sinaakkusersuinissamut piffissaq aningaasarpassuillu atulussinnassagivut, suliassartaviinut atornagit. Isumaqarpunga suleriaaseq taamaattoq akissaqartinngivikkipput. Nunarput taama pisuujutiginngilaq, borgmesteri allagaqarluni tunngavilersuivoq.

Naatsorsuutigisamit akiligassaq annertunerusoq
Taanna aamma Danmarkimi pisunut assersuusiorpoq, tassani naalagaaffimmi atorfiit illoqarfinnut minnerusunnut nussorneqarput, tamannalu ilimagineqartumit akisunerusimavoq.

- Kim Kielsenip paasisariaqarpaa, inuit Nuummut nussorusunnerannut suliffissat kisimik qammaasuunngimmata. Inuilli illorpassuaqarfimmi najugaqarusupput, amerlanerusunik kulturikkut periarfissalimmi, amerlanerusunik suleqateqarlutik, ilinniakkatigut immersuiffigeqatigiiffiusinnaasumi, il.il.. Kissaatit taamaattut sorlaasigut nusuinnarlugit peerneqarsinnaanngillat, Asii Chemnitz Narup naqissusiivoq.

Powered by Labrador CMS