nalunaarsuiffik
Suliffeqarfiit nalunaarsuiffimmut nutaamut nuunneqassapput
Ukiumit nutaamit suliffeqarfiit Inuussutissarsiutinik Ingerlataqartunik Nalunaarsuiffik (IIN) atorunnaassaaq. Taarsiullugu Danmarkimi det Centrale Virksomhedsregister (CVR) atorneqalissaaq.
Kalaallit Nunaanni suliffeqarfiit aamma piginneqatigiiffiit nalunaarsorneqarsimasut CVR-imut namminneq (automatiskiusumik) nuunneqassapput, taamaattumik suliffeqarfiit iliuuseqartariaqanngillt. Kisianni paasissutissat sumiiffimmi nutaami nassaassaalissapput.
Kalaallit oqaasii atorlugit takuneqarsinnaasut
- Tamatuma kingornatigut Kalaallit Nunaanni suliffeqarfiit aamma oqartussaasut ingerlataat CVR-imi takuneqarsinnaassapput CVR-imi normoqarlutik, suliaqarfik, nioqqutissiorfiit, suliffeqarfimmi peqataasut il.il danskit suliffeqarfiisut ittumik takuneqarsinnaallutik. Tamatumunnga ilutigitillugu suliffeqarfiit pillugit paasissutissat kalaallit oqaasii atorlugit takuneqarsinnaassapput, soorlu ullumikkut CVR tuluit oqaasii atorlugit takuneqarsinnaasoq, Akileraartarnermut Aqutsisoqarfimmit nalunaarummi tamanna allaqqavoq.
Suliffeqarfiit nutaat – namminersortuugunik pisortanilluunniit pigineqarunik – nittartagaq www.virk.dk aqqutigalugu nalunaarsorneqartalissapput.
- Kalaallit suliffeqarfiutaasa namminneq paasissutissanik aaqqiisinnaaneq kalaallit oqaasii atorlugit Virk.dk-mi periarfissarilissavaat, tassani nalunaarutigineqarsinnaapput suliffeqarfiit inummit ataatsimik pigineqartut, interessentselskabit, kommanditselskabit, umiarsuaatileqatigiit, aningaasaateqarfiit aamma peqatigiiffiit. Aaqqiineq nutaaq tassaassaaq imminut kiffartuulluni suliaqarsinnaanermik aaqqiineq. Akileraartarnermut Aqutsisoqarfik 31. decembari 2020 tikillugu CVR-imi immersuisarnermut aamma allanngortitsisarnermut pisariaqartitsineq naapertorlugu ikiuuttarsinnaavoq, tamanna ilisimatitsissutigineqarpoq.
- Kalaallit Nunaanni aningaasaliilluni ingerlatsiviit (A/S aamma ApS il.il.) ullumikkut IIN-imi nalunaarsimanermik saniatigut aammattaaq CVR-imi nalunaarsorneqareerput, nalunaarsorsimanermut normumik taaneqartartumik. Ingerlatsiviit (selskabit) 1. januaari 2018 aallarnerfigalugu CVR-normoqalissapput, taanna CVR-imi Virk.dk-mi tamanit takuneqarsinnaalissaaq, tamatuma saniatigut Kalaallit Nunaanni aningaasaliilluni ingerlatsiviit pillugit nalunaarsuineq aamma tamanut saqqummiussineq allamik allannguuteqassanngilaq, tusagassiuutinut nalunaarummi tamanna allaqqavoq.
Nalunaarsorneqarsimasut 6.000-t
Ullumikkut IIN-imi 6000 missaaniittut imikkoortut inatsisitigut pisinnaatitaasuusut pisussaatitaasuusullu ingerlasutut nalunaarsorsimapput. INN nuunneqarpat CVR-imut suliffeqarfiit, ingerlatsiviit (selskabit) aamma oqartussaasut ingerlatsivii nalunaarsorneqarsimasut maannakkut GER normortik pigiinnassavaat, taanna CVR normutut atulissaaq.