Suliffeqarfiit marluk Kalaallit Nunaanni atuarfiliornerit annersaannik suliariumannittussarsiornermut qinnuteqarsimapput
Kalaallit Nunaanni atuarfiliornerit annersaannik suliariumannittussarsiorneq qanittukkut naammassineqarpoq. Sanasoq - NCD - illoqarfiup pingaarnersaani sulisut politikkerillu peqatigalugit maanna suliassamik misissueqqissaarnialerput
Ingerlatseqatigiiffiit marluk Nuup qeqqani atuarfissarsuarmik sanaartortussarsiortoqarmat neqerooruteqarsimapput. Tassaasut MT Højgaard aamma Islandimi ingerlatseqatigiiffik Istak. Suliarinnittussarsiuussineq septembarip 20-ani naammassineqarpoq, maannalu misissuqqissaarnissaq annertooq aallartinneqassalluni.
Neqeroorut allanngortinneqarsinnaavoq
Sapaatip akunnerini tulliuttuni neqeroorutit atuaqqissaarneqassapput, tamatumalu kingorna neqerooruteqartut aallaavittut suliniutissap tunngavissaanik toqqaanissamut tunngavissiisinnaasumik neqeroorumminnik allanngortitsisinnaanerannik isumaqatiginninniarfigineqassapput. Isumaqatiginninnartoqarnerani isumaqatigissuteqarnissallu tungaanut qanoq akeqartitsisoqassanersoq qanorlu piumasaqaatitaqassanersoq allanut tusarliuteqqusaanngillat, NCD-mi pisortaq Jens B. Frederiksen ilisimatitsivoq.
Nalilersuisussat politikkerinit, atuisunit, sanaartornermi siunnersuisartunit, NCD-mit sulisunillu allanit inuttaallit pilersinneqarput. Nalilersuisussat qaammatini aggersuni isumaqatiginninniarnermi angusanik suliassanillu misissuissapput, tamatuma kingorna sanasut sorliit isumaqatigiissuteqarfigineqassanersut isummerfigineqassaaq.
Isumaqatigiissut asseqanngitsoq
Jens B. Frederiksenip Sermitsiaq.AG-mut erseqqissaatigaa, suliarinnittussarsiuussisimaneq manna, taamatut isikkulik Kalaallit Nunaanni siullersaasoq, tassa isumaqatigiissut atuarfiliornermut tunngannarani, aamma atuarfiup ukiuni 30-ni tulliuttuni ingerlanneqarnissaanut aserfallatsaalineqartarnissaanullu tunngassuteqarami.
- Soorunami neqeroorut aningaasatigut iluanaarutaanerpaasussaq toqqassavarput, toqqagassarput imaassinnaavoq akikinnerpaanngitsoq. Neqeroorutigineqartormi ingerlatsinissamut aserfallatsaaliinissamullu tunngatillugu nalilersussagatsigu, Jens B. Frederiksen ilisimatitsivoq.
Tassa MT Højgaardip Istakilluunniit ingerlatsinissaat aserfallatsaaliisarnissaallu piumasaqaataanngilaq, ukiulli 30-t ingerlaneranni qanoq akisutigisumik ingerlanneqarsinnaanera pillugu pilersaarummik saqqummiussissapput.
Piffissaliussaq malinneqarpoq
Sanaartorneq 2020-mi ukiup affaata siulliup ingerlanerani aallartinneqassasoq naatsorsuutigineqarpoq.
Atuarfissaq nutaaq, ASK-mut USK-imullu kingoraartaasussaq, Nuup illoqarfiata qeqqani Blok P-kup inikuani sananeqassaaq, naammassillugulu suliarineqaruni inissaqartissavai atuartut 1200-t, atuareernermi ornittakkagaq meeqqanut 400-nut inissalik, meeqqerivillu meeqqanut nukarlernut angajullernullu 130-nut inissalik.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...