Suliffeqarfiit aningaasaqarnikkut suliaqartut kalaallisut isumaqatigiissuteqartarnissaannik politikkikkut kissaateqarneq
Naalakkersuisut naalagaaffimmi oqartussanut attaveqarusupput, paasiniarlugu suliffeqarfiit aningaasaqarnikkut suliaqartut, soorlu aningaaseriviit kalaallisut allassimasunik isumaqatigiissusiortarnissamut piumasaqarfigineqarsinnaanersut.
Assersuutigalugu aningaaseriviup sillimmasiisarfiulluunniit sullitallu allakkatigut isumaqatigiissutaat kalaallisut allassimasariaqarput, kalaallisuinnaq oqaasillip taamaalilluni suna atsiornerlugu ilisimaniassagamiuk.
Taamatut isumaqarpoq Siumumeersoq Erik Jensen, suliffeqarfiit aningaasaqarnikkut suliaqartut pisisartuminnut neqeroorutigilissagaat, isumaqatigiissutit allattariarsuutitalinnik imallit, pisisartup suliffeqarfiullu akunnerminni isumaqatigiissutaat, kalaallisut suliarineqartalernissaat pillugu Naalakkersuisut nalunaajaateqarnissaannik Inatsisartut aalajangiiffigisassaattut siunnersuuteqarsimasoq.
- Anguniagara qulaaniit isigalugu tassaavoq siunnersuutigissallugu, kalaallisuinnaq oqaluttoqartillugu, inuttaalu aningaaserivimmi atorniarpat imaluunniit sillimmasersorniarpat, qallunaatuinnaq allassimasunik neqeroorfigineqassanngitsoq piumasaasut isumaqatigiissutillu eqqarsaatigalugit, Erik Jensen siunnersuumminut tunngavilersuilluni allappoq.
Naalagaaffimmit akisussaaffigineqartoq
Aningaaseriviit, sillimmasiisarfiit suliffeqarfiillu aningaasaqarnikkut suliaqartut taamatut piumasaqarfigineqassappata, Kalaallit Nunaanni naalagaaffimmi oqartussat piumaffigineqartariaqarput malittarisassanik allanngueqqullugit, oqartussaaffimmi naalagaaffimmi akisussaaffigineqarmat sulilu Kalaallit Nunaannit tiguneqarnikuunani.
Siunnersuutip Inatsisartuni sisamanngorpat suliarineqarnissaa pilersaarutaavoq, Naalakkersuisullu taamatut nalunaajaasiornissamik kissaateqanngillat, Inuussutissarsiornermut Aatsitassanullu Naalakkersuisoq Jens-Frederik Nielsen akissuteqaammini allappoq.
Aningaasanut tunngatillugu isumaqatigiissutit kalaallisut allassimanissaannik peqqussuteqalissagaluarpat, Oqaasileriffiup paasissuutissiissutigaa qallunaat taaguusersueriaasiat nassuiaariaasiallu atorneqarsinnaasoq:
Inatsisilerinikkut taaguusersuutit 6.000-it angullugit suliarineqassasut
- Aningaasanut tunngatillugu isumaqatigiissutit kalaallisut allassimanissaannik peqqussuteqalissagaluarpat, Oqaasileriffiup paasissuutissiissutigaa qallunaat taaguusersueriaasiat nassuiaariaasiallu atorneqarsinnaasoq. Taamaaliortoqassappallu inatsisilerinikkut taaguusersuutit 6000-it tikillugit suliarineqartussaanerat tamatuma nassatarissavaa, naalakkersuisoq akissuteqaammini allappoq.
- Taamaattumik siunnersuut taama ittoq ilimanartumik Naalagaaffimmi oqartussaasoqarfinnit suliarineqassasoq, atuutsilersissaneralu isumalluuterpassuarnik pisariaqartitsissasoq ilisimareerparput. Taamaattumik paasisat tunngavileqqinniarlugit isumalluutinik qanoq atuisoqartigissanersoq nassuiaasiortoqartariaqanngilaq, taanna nangilluni allappoq.
Naalakkersuisulli ajornartorsiut iliuuseqarfigerusuppaat, taamaammallu allannguutissatut siunnersuummik tunniussillutik.
Tassunga taarsiullugu siunnersuutigineqarpoq, Suliffeqarfiup sullitallu akornanni allaganngorlugit isumaqatigiissusiarisartakkamik kalaallisuujutillugit sullitaminnut neqerooruteqartoqartalernissaa Naalakkersuisut Naalagaaffimmi oqartussanut misissorneqarnissaanik kissaateqarnermik saaffiginnittoqarnissaa pillugu Inatsisartut aalajangiiffigisassaattut siunnersuut.