Suliat ilungersunartut kingorna: Kommunep NCD atorunnaarsilerpaa
NCD aamma Iserit kattunneqarnissaat taamatullu kommunep sanaartornermut sulianik tigumminnittunngoqqinnissaa kommunalbestyrelsep aalajangiiffigissavaa.
Kommuneqarfik Sermersuumi kommunalbestyrelse tulliani ataatsimiileruni pingaaruteqarluinnartumik aalajangiissaaq.
Borgmester Charlotte Ludvigsenimi siunnersuuteqarpoq Nuuk City Development (NCD) aamma Iserit kattutsinneqassasut. Taamaasiornermi NCD-p inissiaatai Iserimmut nuutsinneqassapput, taamatullu atuarfiliortiternerit meeqqeriviliortiternerillu kommunip tigummilissallugit.
Ineqarneq pillugu suliami torersaaniarnermi taama siunnersuuteqartoqarpoq. Kommunip inissianut attartortittakkanut tunngatillugu suleriuserisimasaa, sanaartornermullu ingerlatsinera nakkutilliisunit aamma kukkunersiuisunit sakkortuumik isornartorsiorneqarsimavoq.
NCD Nuummi atuarfimmik angisuumik sanaartortitsivoq. Kukkunersiuisut kommuni atuarfimmut akissaqarnersoq apeqqusersimavaa, sanaartornerummi naliga 200 aamma 250 milliuunit koruunit akornanniissangatinneqartoq inisseqqaarnagu sanaartornissaq siumoortumik akuerineqarsimavoq. Akiliinissaq atuarfiup atulersinneqarnerani aatsaat isumagineqassaaq.
2019-mi kommunalbestyrelseusoq NCD-milu siulersuisuni siulittaasuusimasoq siunnersuuteqarpoq NCD-p timersortarfik 12,5 milliuunit koruunilerlugu pisiarissagaa. Timersortarfimmik taamani piginnittuusoq kommunaldirektøriusimasumut qanigisatut attaviuvoq.
Nuuk Centerip allilerneqarnerani NCD aamma suleqataavoq. Suliniulli unitsinneqarpoq NCD aningaasaliinissamut isumaqatigiinnissamut piumaffigineqarmat.
Kommunip aningaasaatai nakkutigineqarnerussapput
Iserit aamma NCD kattutsinneqarpata kommunip aningaasaatimi sumut atorneqarnerinut tunngatillugu ammanerusumik ingerlatsilissasoq ilaatigut tunngavilersuutitut, Kommuneqarfik Sermersuup nittartagaani nutaarsiassami allanneqarpoq.
- Taamaaliornikkut kommunitsinni aningaasat qanoq atorneqarnersut tamakkiisumik ersarissuunissaat qulakkiissavarput. Peqatigitillugu ersarinnerulissaaq NCD pinnani, kommunili nammineq aningaasanik attartorluni aaqqiissuteqarpat akikinnerulissaaq pisariinnerulerlunilu.
- Minnerunngitsumik ineqarnerup tungaatigut pitsanngorsaassaagut, aningaasartuutikillisaanikkut kiisalu inissiaatileqatigiiffik nukittorsagaq qajannaannerusoq, kommunip innuttaasuinut inissiassaqartitsisoq qulakkeerneratigut, borgmester Charlotte Ludvigsen (IA) siunnersuummi tunngavilersuivoq.
Inissianik sanaartornerit kommunip aningaasanut missingersuutaani
Kommunip sanaartornermut suliat tigugunigit aningaasat sumut atorneqarneri pillugit erseqqittumik naatsorsuuteqalissaaq missingersuuteqalerlunilu.
- Siunissami sanaartornermik pilersaarutit kommunalbestyrelsip missingersuutaatigut isumaqatigiissutigineqartassapput taamaalilluni innuttaasunit tamanit takuneqarsinnaassaaq aningaasat sumut atorneqartarnersut. Isumaqarpunga tamanna pingaartuusoq. Taamatut aaqqiissuteqarutta akileraarutinit isertitat sipaagaqarfigissavagut aammalu tamat oqartussaaqataanerat eqqarsaatigalugu ersarinnerulersitsilluta, Charlotte Ludvigsen allappoq.
Nuuk City Developmentip siuelrsuisui sapaatip akunnerata siuliani ilisimatitsipput pisortamut Jens B. Frederiksenimut aamma aningaasaqarnermut pisortamut pisortallu tullianut Peter Christiansenimut suleqatiginninnertik unitsillugu.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...