Skip to main content

Suliassarujussuaq: Nunap napparsimmavissuata nutarterneqarnissaa milliardip affaanik akeqassasoq

Init nallaviit nutaat napparsimasullu najugaqarfissaat nutaaq sananeqarpata, Dronning Ingridip Napparsimmavissua ullutsinnut tulluartunik pigisaqalissaaq. Suliaq ukiuni qulini ingerlassangatinneqarpoq.

Dronning Ingridip Napparsimmavissuata nutarterneqarnissaa pisariaqarpa, Atassutip siulittaasua Aqqalu Jerimiassen paragraf 37 atorlugu taama apeqquteqarpoq.

Ersarilluinnartumik “aap” akissutigineqarpoq. Naalakkersuisut akissummi ilisimatitsissutigaat napparsimmavissuarmi nutarsaanerit ingerlanneqalereersimasut.

Napparsimmaviilli nutaaliat sananeqartarnerannut illutap pitsaassusaa appasippallaarnera ajornartorsiutigineqarpoq, aaqqiissutissamillu allamik misissuisoqalersimavoq. Illutap nutaap sananeqarnissaa eqqarsaatersuutigineqarpoq:

- Illutaq nutaaq 500 milliuunit koruunit missaannik akeqartussatut missingerneqarpoq, peqqissutsimut Naalakkersuisoq, Martha Abelsen, Aqqalu Jerimiassenimut akissutimini allappoq.

Nutarterneqarnissaanut aningaasaliinissaq isumatusaarnerussanngilaq

Abelsenip erseqqissarpaa illutat pigineqareersut nutarsarnissaat siunissaq qaninnerusoq eqqarsaatigalugu akikinnerussasoq, nutarsaanerli ullutsinnut tulluarnavianngilaq, illuap toqqavia pissutaalluni:

- Maanna init nallaviit iluarsarneqarnissaat ajornakusuussaaq, tassa illut maanna sananeqaataat tunngavissat pisoqalisimasut malillugit 70-ikkunni pilersaarusiorneqarsimanerat aammalu pingaartumik init sisamanik siniffissaqarlutik uffarfillit perusuersartarfillillu pineqarnerat pissutigalugu, tamatumani assersuutigalugu kørestolertut isersinnaanatik, Martha Abelsen akissummi allappoq.

- Ullumikkut napparsimmavinni init kisermaattarissat namminneq perusuersartarfiIlit sananeqartarput, assigiinngitsuIlu eqqarsaatigalugit napparsimasut isumannaannerunissaat taamaaliornikkut qulakkeerneqarluni​​​​​​​, ilassutigineqarpoq.

Suliap aallartinnissaanut 12 milliuunit illuartinneqarput

Napparsimasut nallavissaanut napparsimasullu najugaqarfissaanut nutaanut 2020-mi 12 milliuunit koruuninik aningaasaliisoqarsimasoq, aningaasanut inatsimmi allassimavoq. Suliniummut 2020-mi taamaallaat aningaasaliisoqarsimasutut ersippoq, suliniutilli aningaasanut inatsisit ukiuni tullerni sunnertassavai:

- Suliniutip 2020-mi aallartinneqarnissaa pingaaruteqarpoq, pilersaarusiorneq, sanaartornerup piffissalersornera allallu, ukiuni arlalinni ingerlanneqarsinnaanerat pissutigalugu, aningaasanut inatsimmi 2020-moortumi allassimavoq.

Tassani aamma allassimavoq misissorneqassasoq sanaartukkat ilaat aningaasaateqarfinnit aningaasalersorneqarsinnaanersut, sanaartugarlu naammassillugu atorneqalersinnaanera 2030-mut naatsorsuutigineqartoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER