Suliassaqarnerulerneq pissutigalugu akissarsianik qaffaaneq

Kalaallit Airportsimi siulersuisuni siulittaasoq "suliassaqarnerulerneq" pissutigalugu akissarsiai 50 procentimik, tassa 500.000 koruuniniik 750.000 kooruuninut aasakkut 2018-imi qaffanneqarput.

Kalaallit Airportsimi siulersuisuni siulittaasup, Johannus Egholm Hansenip siulittaasutut akissarsiai 250.000 koruuninik ilaneqarsimanerat pillugu, Partii Naleqqameersoq Pele Broberg Naalakkersuisunut paragraf 37 atorlugu arlalinnik apeqquteqarpoq.

Nassuiaat

Akissarsiaasunik qaffaaneq, naalakkersuisoqarfiup pisortaata Søren Hald Møllerip, mailikkut ima tunngavilersorpaa:

- Aningaasarsiassanik qaffaaneq, aningaasassarsiornermi sanaartornerullu nalaani siulersuisuni siulittaasup annertunermik suliassaqalernerani isigineqassaaq, aktieselskabimmi siulersuisuni siulittaasuata suliassai qaangerlugit suliaqartussaavoq, Søren Hald Møller Sermitsiaq.AG-mut ilisimatitsivoq.

Akissarsiaqqortunerpaavoq

Johannus Egholm Hansen, akissarsiassaanik qaffaanerup kinguneranik, namminersorlutik oqartussat suliffeqarfiutaani siulersuisuni siulittaasuusuni akissarsiaqqortunerpaat ilagilerpaat. Taanna Royal Greenlandip siulersuisuni siulittaasuata tulleraa, taannami maanna koruuninik milliuunit affaannik kisimiilluni akissarsiaqartinneqarami.

Namminersorlutik Oqartussat suliffeqarfiutaanni allani ukiumut kaaviiaartitaqangaatsiartuni, siulersuisuni siulittaasut ukiumut 350.000 koruuninik akissarsiaqartinneqarput, minnerpaamilli 150.000 koruuninik akissarsiaqartinneqarlutik. Akissarsiaqartitsisarneq pillugu uani takusaqarsinnaavutit.

Søren Hald Møller ilanngullugu ilisimatitsivoq Namminersorlutik Oqartussat suliffeqarfiutaani siulersuisuni siulittaasut akissarsiaannik allannguisitsisoqarnissaanik ilisimasaqarani.

Powered by Labrador CMS