Suliassaq aaqqiivigineqarsinnaanngitsoq Kielsenip ima aaqqinniarpaa
Ilinniartitsisunik aamma perorsaasunik amigaateqarluni meeqqat atuarfianni pitsaassuseq qanoq qaffanneqarsinnaava. Kim Kielsen pilersaaruteqarpoq.
Meeqqat atuarfiat nukittorsarneqassaq qineqqusaarnermi partiit akornanni isumaqatigiissutigineqarpoq, nuna taamaalilluni pikkorinnerujussuarnik atuartoqalerniassammat, illuaniillu ilinniaqqikkusullutik naammassisalissammata.
Sungiussiartortinneqarnerat ukkataralugu
Aningaasaqarnermut Siunnersuisoqatigiit atuarfimmi sungiussiartortitsisarneq ukkataraa. Meeqqat atuarnerminnik aallartilluarunik, pissarsiaqarnerpaallutillu sunniuteqarnerpaajusarput. Taamaammat partiit arlallit – ilaatigut IA-p – ukioqatigiiaani minnerni atuartitsinermi iliniartitsisut marluusarnissaat imaluunniit ilinniartitsisoq perorsaasorlu marluusarnissaat kissaatigaat.
- Utoqqarnik soraarninngorsimasunik annertuumik isumalluutissaqarpugut. Taakku ukioqqortusisimagaluarlutik amerlasuut inuiaqatigiinnut iluaqutaasinnaallutik piginnaasaqarput misilittagaqarlutillu, Kim Kielsen Sermitsiaq.AG-mi apersorneqarnermini nassuiaavoq.
Utoqqaat toqqissimanermik pilersitsillik
- Siumut oqarpoq: Meeqqat atuarfiini utoqqaat toqqissimanermik pilersitsinissaannut periarfissitsigit, Kim Kielsen oqarpoq, Vivian Motzfeldtillu pingasunngormat soraarnerussutisianut siunnersuutaanut innersuussilluni.
Soraarninngortut suliinnarunik soraarnerussutisiaasa ikilineqartannginnissaannut siunnersuut tunngassuteqarpoq. Aningaasaqarnikkut taamatut pilerisaarummik utoqqaat amerlanerusut imaluunniit piffissami sivikinnerusumi suliinnartalernissaannik Siumut neriuuteqarpoq.
Kinguaariit avissaanganerat annikillisillugu
Utoqqaat amerlanerusut piffissap affaani imaluunniit pisinnaasartik naapertorlugu sivikinnerusumik atorfeqartarnissaannik pisariaqartitsisoqartoq, Kim Kielsen naqissusiivoq.
- Inuiaqatigiit atorfissaqartippaat. Taamaalilluta aamma kinguaariit akornanni attaveqatigiinnerup annerusup pilersinnissaanut periarfissaqassaagut, Kim Kielsen oqarpoq, taassuma qularutiginngilaa, utoqqaat nukarlernut ilaatigut isumassorneqarnissamik pisariaqartitsisunut maligassiuilluartuussasut.
Dorisip siunnersuutaa isornartorsiorneqartoq Kimip taperserpaa
Ilinniartitsisunik amigaateqalernissaq pinngitsoortinniarlugu Ilinniarfissuarmi ilinnialernissamut piumasaqaatit apparneqarnissaannik Doris J. Jensen siunnersuuteqarnermini isornartorsiorneqarpoq. Siunnersuut taanna ilinniartitsisunngorniarfiup pisortaanit, ilinniartitsisut kattuffiata siulittaasuanit aamma Sulisitsisunit ingerlaannaq itigartinneqarpoq.
Doris J. Jensenip isumassarsiaa Kim Kielsenip tamakkiisumik taperserpaa.
- Ilinniarfissuarmi ilinnialernissamut piumasaqaatit maani Nunatsinni Danmarkimit qaffasinnerunerat iluaqutaanavianngilaq. Assersuutigalugu ilinnialernissamut maani itigartitaasut Danmarkimi ilinniartitsisunngorniarsinnaasut takusareernikuuagut, Kim Kielsen ilisimatitsivoq, taassuma ilinniartut Nuummi Ilinniarfissuarmi piumasaqaatit sorliit aporfigisimaneraat erseqqissaatigerusunngilaa.