Pituffik

Suliariumannittussarsiuussinermut malittarisassat allanngorsimaneri Naalakkersuisunit ilisimaneqartoq

Namminersorlutik Oqartussat Pituffimmi kiffartuussinermut isumaqatigiissutip annaaneranut akisussaaqataasoq KNR-ip Nunanut allanut tunngasunut ministereqarfimmi allagaatinik takunnissinnaatitaanermik pissarsereerluni AG-mi allaaserineqartoq paasivaa

Oqaaseqatigiiliat Pituffimmi suliassat pillugit kiffartuussinissamut isumaqatigiissummi piumasaqaatigineqartut Namminersorlutik Oqartussat namminneq akuerisimavaat, taamaasilluni Exelis Services qinnuteqareernermi kingorna kiffartuussinissamut isumaqatigiissummik akuerineqarluni.

Aviisi AG ima qulequtaqartumi 'Pituffimmi isumaqatigiissummik annaasaqarneq kalaallit namminneq pisuussutigaat' februaarip sisamaani allappoq.

Pisoq pillugu pappilissanik paasissutissanik KNR pissarsivoq. AG-minngaannit allaaserineqartoq uppernarsarneqarpoq, tassami Namminersorlutik Oqartussat kiffartuussinissamut isumaqatigiissusiornermi akisussaaqataasoq paasineqarpoq.

Tassani takuneqarsinnaavoq Namminersorlutik Oqartussat nunanut allanut allaffeqarfiani, Nunattalu Danmarkimi sinniisoqarfiani atorfikkaat Qallunaat nunanut allanut tunngasunut ministereqarfiani ukiaanerani 2013-imi qaammatini arlalinni Pituffimmi sullissisussarsiortarnermi aalajangiinermi tunngavissanik allannguutissanik siunnersuusiorlutik suleqataasimasut, Radioavisi ilisimatitsivoq. Aammattaaq takuneqarsinnaavoq, Nuummi Inuussutissarsiornermut- Akileraartarnermullu Naalakkersuisoqarfimmeersut allannguutissatut siunnersuutit akuerisimagaat.

Nassuiaatigineqartunit allamik pisoqartoq
Taamaakkaluartoq Namminersorlutik Oqartussanit siuliani Naalakkersuisuusimasunit aamma Naalakkersuisuusunit pisortatigoortumik nalunaarutigineqartarpoq suliariumannittussarsiuussinermut malittarisassat allanngorsimaneri ilisimanagit. Suliariumannittussarsiuussinermut malittarisassat allanngorsimaneri Kalaallit Nunaata ilisimanngikkai oqaatigineqartarpoq.

Suliffeqarfiit Pituffimmi suliassat pillugit sullissinissamik isumaqatigiissummik neqerooruteqarsinnaasut Nunanut allanut ministeriarfimmit akueriumaneqanngimmata nutaamik oqaaseqaatigiiliortoqartariaqalerpoq. Ingerlatseqatigiiffiit EU-p sinneraneersut isumaqatigiissummik danskit kalaallillu ingerlatseqatigiiffiutaannut, ingammik Greenland Contractorsimik, pingajorarterutaa Namminersorlutik Oqartussanit pigineqartumik, salliutitsinerit EU-mi pisinnaatitaaffiit malillugit akerliusinnaasut paasineqarnerat pissutaavoq.

Naalakkersuisoqarfiup pisortaa atorfimminit tunuartinneqarallartoq
Naalakkersuisut siulittaasuat Kim Kielsen Siumumeersoq tusagassiuutinut nalunaarummi marlunngormat naatsumik allappoq Naalakkersuisut Siulittaasuata Nalaakkersuisoqarfiani Naalakkersuisoqarfiup pisortaa Svend Hardenberg atorfimminit tunuartinneqarallartoq.

Hardenbergip atorfimminit tunuartinneqarallarnera Kim Kielsenip annertunerusumik oqaaseqarusunngilaa inunnut ataasiakkaanut tunngassuteqartuunera pissutigalugu.

Pituffimmi kiffartuussinissamut suliffeqarfik isumaqatigiissuteqalersumut nunanit allanit pigineqartuunersoq USA-mi silaannakkut sakkutuuisa paasiniaammata danskit nunanut allanut ministeriaqarfiat apeqqutigineqartup akinisissaanut ikiuerusussimanngitsoq Finansimit pingasunngormat allaaserineqarpoq.

Powered by Labrador CMS