Suliariumannittussarsiornerup KONFIFA-p nuunneqarnissaanik kinguartitsivoq
Siullermik siunnersorteqarfik Namminersorlutik Oqartussanut nuunneqartussaagaluarpoq, kingorna attuumassuteqanngitsumut suliassanngortinneqarpoq, maannali suliariumannittussarsiornissamik suliaqartoqarnerani aamma atorfinitsitsinermut tunngasunik qulaajaasoqarnerani, KNAPK-mit piffissami aalajangersimasumi ingerlanneqaqqissaaq, taama nassuiaasoqarpoq.
Naalakkersuisut aalisartunut piniartunullu siunnersorteqarfimmik KONFIFA-mik ingerlatsisussamik nutaamik suliariumannittussarsiornissamik suliaqarnissamut periarfissikkumallugit, KNAPK siunnersorteqarfimmik ukiup affaani tulliuttumi akisussaasunngortinneqarpoq. Aningaasaqarnermut, Ingerlatsinermut, Sulisoqarnermut aamma Piniarnermut Aalisarnermut Naalakkersuisoqarfimmi atorfilittaq, Sermitsiaq.AG-mut taama ilisimatitsivoq.
Suliaq pillugu aaqqissuisoqarfik naalakkersuisumik iluatsinngitsumik apersuiumagaluarpoq. Naalakkersuisut sinnerlugit naalakkersuisoqarfimmi atorfilittaqarfik ima akissuteqarpoq:
- Suliassat naleqquttumik nuunneqarnissaat pissusissamisoorpoq.
Naalakkersuisut KNAPK-mut isumaqatigiissutiminnik taakku naammaginngeqisaannik atorunnaarsitsinerup kingorna, piniartunik aalisartunillu siunnersorteqarfik atorlugu ukiup affaani kiffartuussinissamik nutaamik isumaqatigiisuteqartoqarpoq.
Atorfinitsitsinermut inatsisit aporfiusut
Aalajangerneq KNAPK-p tamanut ammasumik isornartorsiorpaa, siunnersorteqarfimmilu sulisut marluk suliunnaarsinneqarnerinut atatillugu aningaasartuutit matussuserneqarnissaannut naalakkersuisoqarfimmut akiliisitsinissamik piumasaqarnissaq aarlerisaarutigalugu.
- Atorfinitsitsinermut inatsisit atuummata, suliap pitsaanerpaamik nuunneqarnissaanik ujartuisariaqarsimavugut, taama allappoq.
Politikkikkut oqaaseqartoqarumanngitsoq
Aalajangerneq sioqqutingaatsiarlugu tamanna ilisimaneqarsimannginnersoq, aamma isumaqatigiissutip Namminersorlutik Oqartussat KNAPK-mut ukiumut 2.2 millionit koruuninik akiliuteqarfiusup ukioq manna 1. januaarimi atorunnaarsinneqarnissaanik aalajangerneq pillugu, Sermitsiaq.AG-p aalisarnermut piniarnermut naalakkersuisoq, Karl Tobiassen (S) apererusussimagaluarpaa.
- Ilisimaneqareersutut aningaasanut inatsisissaq 21. november 2022-mi akuerineqarpoq. Suliariumannittussarsiornissamullu piumasaqaataasussanik suliaqarnissamut tamanna unammilligassaqartitsisimavoq. 2023-mut aningaasanut inatsisissap akuerineqarnerata kingorna KNAPK tamanna pillugu ilisimatinneqarpoq. Tamatuma kingorna kattuffiup naalakkersuisoqarfiullu akornanni oqaloqatigiittoqarpoq.
Aalajangerneq politikkikkut akuerineqarpoq, atorfilittaqarfik ilisimatitsivoq, kisianni politikerinik suliaq pillugu apersortikkusuttoqanngilaq.