Suliareqqitassanngortitat: Angutit marluk kinguaassiuutitigut atornerluisimasutut pineqaatissinneqartut
Angutit marluk sapaatip akunnerani matumani suliareqqitassanngortitsilluni suliani marlunni assigiinngitsuni, meeqqanik kinguaassiuutitigut atornerluisimasutut ukiuni pingasuni qaammatinilu arfinilinni aamma ukiuni tallimani pinerluuteqqarsimasunut inissiisarfimmiittussanngorlugit pineqaatissinneqarsimapput.
Eqqartuussinermi siullermi ataasinngormat ingerlanneqartumi, angut 42-nik ukiulik jornguminik niviarsiaqqamik ukiut 13-it ingerlaneranni arlaleriarluni pinngitsaaliilluni atoqateqartarsimanini pillugu pineqaatissinneqarpoq. Niviarsiaraq arfineq-pingasunilli ukioqartoq pinngitsaalillugu atoqatigisarsimavaa.
Kinguaassiuutitigut atornerluinerit Ilulissani 2008 sioqqullugu pisarsimapput, Kalaallit Nunaanni Politiit tugassiorfinnut nalunaarutaanni atuarneqarsinnaavoq.
Angut pineqartoq najukkami eqqartuussivimmit ukiuni pingasuni pinerluuteqarsimasunut innissiisarfimmiittussanngorlugu pineqaatissinneqarsimavoq, pinngitsuutinneqarnissailu anguniarlugu eqqartuussut suliareqqitassanngortissimavaa, Kalaallilli Nunaata Eqqartuussivianit pineqaatissiissut sivitsorlugu ukiuni pingasuni qaammatinilu arfinilinni atuuttussanngortinneqaannarpoq.
- Naammagisimaarpara najukkami eqqartuussiviup pineqaatissiissutaanit sakkortunerusumik pineqaatissinneqarnissaanik kissaateqarnera nunatta eqqartuussivianit malinneqarmat. Kinguaassiuutitigut atornerluisimanerit ukiut aqqaneq-marluk matuma siorna pisarsimagaluartut, unnerluutigineqartup sakkortunerusumik pineqaatissinneqarnissaanik unnerluussisussaatitaasut kissaateqarnerat nunatta eqqartuussivianit isumaqatigineqarpoq, unnerluussisussaatitaasoq Christian Halstad oqarpoq.
Pineqaatissiissut aalajangiussimaneqartoq
Nunatta eqqartuussiviani pingasunngormat eqqartuussineq alla ingerlanneqarpoq, tassani angut 54-inik ukiulik panissaminik arlaleriarluni attuualaaralunilu pinngitsaaliilluni atoqateqartarsimasutut pineqaatissinneqarpoq. Niviarsiaraq arfineq-pingasunik ukioqartorli attuualaarinnittarnera aallartissimavoq, niviarsiaqqallu 14-inik ukioqarnerani pingitsaaliilluni atoqatiginnittalersimalluni. Kinguaassiuutitigut atornerluinerit Uummannami pisarsimapput, 2019-illu naanerani aatsaat unitsinneqarsimallutik.
Angut najukkami eqqartuussivimmi eqqartuunneqarami ukiuni tallimani pinerluuteqarsimasunut inissiisarfimmiittussanngorlugu pineqaatissinneqarpoq. Angutip pinngitsuutinneqarnissani anguniarlugu eqqartuussut suliareqqitassanngortissimavaa, najukkami eqqartuussivimmit pineqaatissiissutigineqarsimasoq pingasunngormat nunatta eqqartuussivianit aalajangiussimaneqarpoq.