Skip to main content

Suliaq mamianartoq nutaaq kommunalbestyrelsemut saqqummiunneqartussanngorpoq

Kommuneqarfik Sermersuup Munckgruppillu akornanni asfaltiliorfimmik pisinermut isumaqatigiissut kommunalbestyrelsemit akuerineqarsimanngisaannarpoq.

Suliaq mamianartoq allat Kommuneqarfik Sermersuumi kommunalbestyrelsep torersaaffigisussanngorpaa.

Kommunip suliarisimasaasa misissuiffiginerini paasineqarpoq Kommuneqarfik Sermersuup Munckgruppellu akornanni pisinermut tunngatillugu isumaqatigiissut 20 milliuunit koruuninik naleqartoq kommunalbestyrelsep akuerisimanngisaannaraa.

Akiligassaq tamakkerluni akilerneqarsimanngilaq, kommunalbestyrelsemilu suliarineqarsimanani.

Kommuneqarfik Sermersooq tusagassiorfinnut nalunaaruteqarluni allappoq.

Isumaqatigiissut ukiut marluk matuma siorna naammassineqarpoq. Kommuni taamani ilisimatitsivoq asfaltiliuutip tigunerani suliaqarsinnaaneq pingasoriaatinngortoq, asfaltiliorfillu Paamiunut aamma assartuisinnaalerluni.

- Pissusissamisuunngitsunik nassaaqqaaratta ingerlatsivimmut ersarissumik nalunaaruteqarpunga suna tamaat misissortissallugu saqqummiunneqassasullu, borgmesteritut tunuarniuteqaqqammertoq, Charlotte Ludvigsen tusagassiorfinnut nalunaarummi oqarpoq.

Akuerineqarsimanngitsoq

Sanarfinermut avatangiisinullu aqutsisoqarfiup iluani suliassanik torersaassinermut tunngatillugu suliat kukkuluttuutaasut, missingersuutinullu ilanngunneqarsimanngitsut paasineqarput.

Isumaqatigiissut 20 milliuunit koruuninik naleqarpoq. Taakkunannga 7,5 milliuunit koruunit aningaasanut missingersuutinit akilerneqareersimapput. Kommunillu 12,5 milliuunit koruunit sinneruttut missingersuutinut nutaanut ilannguttariaqalissavai, akiligassaq tamakkerlugu akilissaguniuk.

Kommuneqarfik Sermersooq ilisimatitsivoq aningaasat missingersuutinut 2023-moortumut ilanngutsinniarlugit kommunalbestyrelse ataasinngorpat ataatsimiileruni eqqartuissasoq.

- Soorunami suliami pingaaruteqarluinnartumi kukkusoqarsimanera assorsuaq uggoraara, massakkullu pingaarneruvoq kukkuneq nanineqarmat pissutsillu aaqqiivigisinnaagatsigit.  Tamarmik isumaqatigiipput nutaamik asfaltiliorfimmik pisariaqartitsisugut, maannalu akiliinissaq qulakkeertariaqarparput, Charlotte Ludvigsen oqarpoq.

Suliap akuerineqarsimannginnerannut pissutigitinneqarpoq isumaqatigiissut coronap tunillaassuutileqqaarnerani pisimammat, taamanilu kommunalbestyrelsep ataatsimiitinnissaanut pilersaarusiornissaq ajornakusoorsimalluni.

Pisinermi isumaqatigiissut piaarnerpaamik Aningaasaqarnermut Inuussutissarsiornermullu Ataatsimiititami aamma kingornatigut Kommunalbestyrelsimut saqqummiunneqassaaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER