Suliaq annertooq: Aalisarnermi atortutoqqat qallorneqarsimasut
KNAPK-p Ilulissani immikkoortortaqarfia iluatsitsilluartumik imaani aalisarnermi atortukorpassuarnik saliillunilu qalluisimavoq.
Ilulissani qanittukkut saliinersuaqarsimavoq, qassutikut ningittagakullu qallorneqarsimallutik.
Aalisartut Piniartullu Kattuffiata KNAPK-p Ilulissani immikkoortortaqarfia IAPP saliisimavoq, saliinerlu sapaatip akunnerata missaanik sivisussuseqarsimalluni, kattuffik tusagassiorfinnut nalunaaruteqarnermi ilisimatitsivoq.
- Aamma illuaqqat eqqaanni saliisoqarpoq, eqqakkat assigiinngitsut, batteriikut kiisalu aalisarnermi atortukut katersorneqarlutik. Umiatsiaaraq Poca 600 atorlugu eqqakkanik katersivut, pingasoriarlutalu utertarluta assartuisimalluta, nalunaarumi allassimavoq.
Oktobarimi novembarimilu taamatut saliisoqarnissaa aamma pilersaarutaavoq.
KNAPK-mi siulittaasup Henrik Sandgreenip saliisimaneq nersualaarlugut oqaatigaa:
- Kattuffiup tungaanit qullersaqarfik aqqutigeqqaanngikkaluarlugu ataqatigiissaarilluarsimanerat assorsuaq tulluussimaarutigaarput. Najukkami peqatigiiffik aqqutigalugu, sumiiffimminni saliillutik angusaqarluarsimanerat nuanneqaaq. Tamatsinnut maligassiuisuupput.
- KNAPK taamaammat kattuffittut immikkut ittumik saliinissamut tapiissuteqarsimavoq. Saliinermut ikiuuttunut tamanut qujavugut, Henrik Sandgreen oqarpoq.
Saliinissaq piviusunngortinneqarsinnaasimavoq, peqatigiiffiit kattuffiillu arlallit suliniummut tapiissuteqarnerisigut.