annaassiniarneq
Suli neriuttoqarpoq
Unnugu kingusinnerusukkut aalajangerneqassaaq ujaasineq qanoq sivisutigisumik nanginneqassanersoq
Ullumi sapaammi nalunaaqutaq 17 tikillugu Tasiilap eqqaani timmisartumik tammaaneqartumik ujaasineq kinguneqanngilaq, Naviair-ip tusagassaqartitsinermut ataqatigiissaarisua Camilla Hegnsborg paasissutissiivoq.
Sakkutuut timmisartuat Challenger maanna Keflavikimut utereerpoq ullumilu tikeqqissanani.
Maannakkorpiaq Air Greenlandip helikopteria Sikorsky timmisartumik timmisartortartumillu, kingullermik sisamanngormat ualikkut attaveqarfigineqarsimasumik, kisimi ujaasivoq.
Sikorsky taarsinissaata tungaanut ujaasissaaq, Camilla Hegnsborg oqarpoq.
Ujaasineq qanoq sivisutigisumik nanginneqassava?
– Tamanna naluara, unnuguli Sikorsky utereerpat ilisimatitsinermi apeqqut ajornakusoortoq tamanna isummerfigineqarumaarpoq, Camilla Hegnsborg oqarpoq.