atornerluineq
Suleqatinut nakkutiginninneq killissamik qaangiineruvoq
Nakkutiginnilluni paasisaagaanni kinguneqarnerlussinnaavoq, Naalakkersuisuni ilaasortaanikoq Steen Lynge isumaqarpoq
Atornerluinermi inuit pingaarutilittut suliffeqarfinni sulisunut imigassamik ikiaaroornartumillu atuisunut nakkutilliisussanik peqalissappat kinguneqarnerlussinnaasoq peqqissutsimut naalakkersuisuunikoq Steen Lynge isumaqarpoq.
- Suleqatit atornerluisuunerarlugit taakkartuineq pineqartumut suliffimmi kinguneqarnerlussinnaavoq, siunissamiluunniit suliffigilersinnaasaanut, Steen Lynge (S) Sermitsiaq.AG-mut erseqqissaavoq.
Atornerluineq akiorniarlugu atornerluinermut inunnik pingaarutilinnik suleqatinut nakkutiginnittussamik pikkorissaasoqassasoq Naalakkersuisut siunnersuutigaat.
Atuaruk: GE: Nakkutiginninneq mianernarpoq
Atornerluinermut inuit pingaarutillit suleqatitik atornerluisuuneranik pasitsaassigunik ikiorneqarnissaannut kaammattuisussatut siunertaqartinneqarput. Taakkulu nuna tamakkerlugu suliffeqarfinni pilersinniarneqarlutik.
Naak siunertaq pitsaagaluartoq suliffiup avataani inuuneq suliffigisamut akuliunissaa ajornartorsiutinik pilersitsissasoq Steen Lynge isumaqarpoq.
- Suliffeqarfik soraarsitsinissaminut peqquteqalersinnaavoq naak "atornerluineq paasineqanngikkallarmat" sulisoq akisussaaffeqarluni suleqataagaluartoq. Sulisulluunniit pineqartup suliffissarsiornermini akornutigilersinnaallugu atornerluisutut inissinneqarnikuugami, peqqissutsimut naalakkersuisuunikoq isumaqarpoq.
Atornerluineq pillugu inuit pingaarutillit atornerluinermut ilisimasanut qitiusoqarfimmik kommunini tamani pilersinniarneqartumi pikkorissartinneqassapput. Pikkorissaanerullu aningaasartuutaanissaa aamma ajornartorsiutaasoq Steen Lynge isumaqarpoq.
- Naalakkersuisut siunnersuutertik tunuartiinnartariaqaraluarpaat, ikiuinissamullu sinaakkutassanik pitsaanerusunik pilersitsillutik, oqarpoq.