Suleqatigiissitsisut: Bilagit amigaataasut partiimullu attuumassuteqanngitsumik atuineq

Suleqatigiissitsisut siulersuisuini ilaasortaasimasup mailit siorna nassiunneqarsimasut tamanut takusassianngortissimavai, tassani nammineq isummani malillugu atuivallaarsimaneq Tillie Martinussenimut erseqqissaatigisimallugu. Tamatuma saniatigut taanna isumaqarpoq, ukioq manna bilagit 500-nik amerlanerusuut amigaataasut. Siulersuisuunerilli pasilliutigineqartunut isumaqataanngillat.

Siulersuisuunerni ilaasortaasimasup Jan Joe Seidsenip arlaleriarluni Tillie Martinussenimut mailikkut nalunaarutigisarsimavaa, partiip aningaasaataanik atuinera isummani malillugu pitsaasuunngitsoq, aamma atuinerup malitsigisaanik qineqqusaarnissamut aningaasassaqartitsisoqanngitsoq. Taamatulli isornartorsiuinermini kisimiippoq, siulersuisuunerit erseqqissaapput.

-Bilaginik amigaateqartoqarneraanera ilumuunngilaq. Partiip aningaasaatai atorlugit pisiaasimasunut tamanut bilagit partiimit tigummiarneqarput, kukkunersiuisartunullu avataaneersunut misissugassanngortinneqarsinnaallutik. Bilaginik 500-nik amigaateqanngilagut. Uppernarsaatit tamaasa tigummiarpavut, soorlu aamma partiip karsia imaqartoq, siulersuisuunerni ilaasorta Kim Lyberth allakkatigut akissuteqarluni oqarpoq.

Aningaasanik atuipilunnerit UNITSIGUK, sulerisutinuna???

Siulersisuunerni ilaasortaasimasup Jan Joe Sidsenip siulittaasuugallartumut Tillie Martinussenimut 2019-imi juunip 24-ani mailerutigisimasaani oqaatisit sakkortuut taakku atuarneqarsinnaapput.

Partiimut attuumassuteqanngitsumik aningaasartuuteqarsimanermik nassuerutiginnittoq

Mailimi Sermitsiaq.AG-p pissarsiarisimasaani takuneqarsinnaavoq, partiip naatsorsuuserisorisimasaata Jan Joe Seidsenip siulittaasuugallartumut Tillie Martinussenimut qanoq allassimanera:

- Akiligassamik akiliiniarlunga takusinnaavara arlaleriarlutik aningaasanik tigusisarsimasutit aamma ullut 14-it ingerlanerinnaanni pisiniarfinni assigiinngitsuni pisiaqartarsimasutit. Aamma Itunesimut Sportitymillu korti atortarsimagit takuneqarsinnaavoq. Partiip taakku aningaasaatigai, aningaasat kukknersiuisup naatsorsuinermini akuerisassai.

Tillie Martinussen akissuteqarluni imatut allassimavoq:

- Hej. Aap, partiimut attuumassuteqanngitsut utertillugit akilissaqqaarpakka.

Utertitsillunili akiuluteqartoqarsimanersoq Sermitsiaq.AG-mit akissutissarsineqarsimanngilaq.

Jan Joe Seidsen siorna septembarip qaammataani aningaaserisutut tunuarpoq, ukioq mannalu juunip qaammataani aningaaserisunngoqqilluni, taamaammat Tilliie Martinussen aningaasanik utertitsisimanersoq ilisimanngilaa.

Aningaasanik pingaarnersiuineq isumaqatigiinngissutaasoq

Taassuma septembarip qaammataani ukioq manna naatsorsuutit misissorlugit aallartissimavaa, tassanilu nammineq isummani malillugu ajortoqartoq maluginialersimallugu.

Sermitsiaq.AG-mit partiip kortianit 2020-mi tiguneqarsimasut takussutissartaat pissarsiarineqarsimavoq. Aaqqissuisoqarfimmiillu aningaasat atorneqarsimasut pillugit partiimi siulersuisuunerit aamma siulittaasuugallartoq Tillie Martinussen nassuiaatinniarneqarsimagaluarput.

Ilaatigut Jyskimut 6000 koruunit, suliffeqarfimmut nussuisartumut 3000 koruunit, Nuuk Glasimut 8000 koruunit suliffeqarfimmullu eqqiaasitsisartumut 3000 koruunit atorneqarsimanerisa saniatigut 8000 koruuninik tigusisoqarsimavoq.

Taakkua saniatigut katsorsaasartumut 50.000 koruunit missaanniittut, pinnersartinnermut 30.000 koruuningajalluinnaat oqarasuaammullu 26.000 koruunit atorneqarsimapput.

Partiip kortia utertissagaa

Jan Joe Seidsenip ukioq manna septembarip 28-ani mailikkut, Sermitsiaq.AG-mit aamma pissarsiarineqarsimasumi, Tillie Martinussenimut piumasarisimavaa, partiip dankortia utertissagaa, siunissamilu aningaasartuutini nammineq akileqqaartalissagai, kingusinnerusukkut siulersuisuunernut akueriteriarlugit utertinneqartarnissaat siunertaralugu. Ukioq manna oktobarip talliamaani bilagit allattorsimaffii quppernernik qulinik annertussusillit amigaatigisani tigorusullugit nukingisaarutigisimavaa.

- Tamatuma malitsigisaanik siulersuisuunerit ukioq manna oktobarip aqqaneq-aappaanni ataatsimiipput, tassani aningaaserivimmit takussutissat, tassa ukioq manna aningaasat sumut atorneqarsimanerannut takussutissat saqqummiuppakka.

- Maannakkorpiaq naatsorsuutit qanoq ittuunersut takutissinnaanngilakka, bilagit 500-t sinnerlugit amerlassusillit Tilliemit amigaatigingakkit, taanna oqarpoq.

Siulersuisuunerit aningaasartuutit akuerineqarsimanerannik ajunngitsuuneranni oqaaseqarsimanertik attatiinnarpaat

Kim Lyberth siulersisuunernit akissuteqarluni allappoq:

- Sammineqarnerujussuarput pissutigalugu, kukkunersiuisarfik avataaneersoq 2020-mi bilagiutitsinnik tamanik ingerlaavartumik misissuisussanngortissimavarput.

- Taamaaliornerput immikkut illuinnartumik iliuusaavoq, nalinginnaasumimmi ukioq naatsorsuuteqarfiusoq naagaangat tamanna pisaraluarpoq. Suleqatigiissitsisulli ullumikkut sammineqarnerujussuat pissutigalugu taamatut alloriarnissarput aalajangiussimavarput, Suleqatigiissitsisuni ammasumik ileqqorissaartumillu tunngaveqarluni ingerlatsinissaq siunertaajuaannarsimammat, taanna Sermitsiaq.AG-mut allappoq.

- Pasilliutini siusinnersusukkut akerlilersimasatsinni nutaartaqanngilaq, Kim Lyberth naggasiivoq.

Sermitsiaq.AG-mit 2020-mi aningaasartuutaasimasut assigiinngitsut Tillie Martinussenimut siulersuisuunernullu nassuiartinniarneqaraluarput, tamannali ajornavissimavoq.

Powered by Labrador CMS