Suleqatigiissitsisut: Angumersiniaaneq
Partii nutaaq pingasunngornermi ualingaa Nuuk Centerimi atsiornernik katersivoq. Partii qinigassanngortitaqassanguni atsiornerit 200-t missaanniittut suli amigaatingai
Sermitsiaq.AG-p partiimik nutaamik Suleqatigiissitsisummik socialliberalimik pilersitsisisut, Michael Rosing aamma Tillie Martinussen pingasunngornermi Nuuk Centerimi atsiornernik katersisut, oqaloqatigai.
Taakku Inatsisartunut qinigassanngortitaqarnissamut angumersiniaassagunik partiip atsiornerit 942-t katersorsimasariaqarpai.
- Atsiornerit 200-t missaanni suli amigaatigaagut. Qinersinissamik suaarutiginnittoqarneraniit atsiornerit 100-t sinnillit katersorsimavagut, massakkulli katersinerput sukkaqaaq, Tillie Martinussen oqarpoq.
Piareernissaq naatsorsuutigineqartoq
Katersineq Nuummi pingaartumik januarip qaammataaniik Unnuk Kulturisiorfimmi suliffeqarfinnilu assigiinngitsuni ingerlanneqalersimavoq.
- Katersinerput ataasinngornermi naammassinissaa naatsorsuutigaarput, Michael Rosing neriulluaqaluni oqarpoq.
Tamat oqartussaaqataanerannik ipisitsisoq
Tillie Martinussenip, Kim Kielsen upernaakkut ataatsimiinnissaq utaqqinagu massakkut qinersinissamik suaarutiginninnera, pakatsissutigaa.
- Isumaqarpunga tamat oqartussaaqataanerannik ipisitseriaanerusoq. Naluara Kim Kielsen sooq qinersinissamik suaarutiginninnersoq, partiimmi nutaat takkuteqqammertut nalunngikkaluarpaa, taamaammat qinersinissamik suaarutiginninnissani upernaamut ataatsimiilernissamut utaqqitissinnaangaluarpaa. Ilaasortassarsiorneq immikkut aningaasartuutaassaaq, katersiniarnermilu piffissakitsuaraavugut, taanna oqarpoq.
Qinersinerup kingorna inatsisissatut siunnersuuteqarniartoq
Taamaammat Michael Rosing ajornannginnerusumik partiiliortoqarsinnaanissaa pillugu inatsisissatut siunnersuuteqarniarpoq.
- Massakkut inatsit atuuttoq aporfeqarpallaaqaaq, partiiliorniarnermi annertuallaamik piumasaqaatitaqarpoq. Tamanna uagutsinnut Nuummi najugaqartunut ajornapallaanngilaq, kisianni sumiiffinni mikinerusuni atsiornerit 900-t katersornissaat ajornakusoornerusinnaavoq. Qinersereernerup kingorna atsiornerit taamaallaat 500-t katersorneqartalernissaat pillugu siunnersuuteqassaanga, taanna qinersineq 24. april pissasoq neriuutigalugu oqarpoq.
Maanna tikillugu taakku marluk kisimik partiimut qinigassanngortittussaapput.
- Taamaakkaluartoq inuit tallimat missaanni partiimut qinigassanngortinnissaq soqutigaat. Oqaloqatigisimasagut siornatigut politikkimik suliaqarsimanngillat, kisianni allattoqarfinni partiinilu sulisarsimallutik, Tillie Martinussen, pineqartut kikkuunerat oqaatigiumanagu, oqarpoq.
