Suleqatigiissitsisut: Allatut akitsuusersuisinnaavugut
Partii talerperliusoq alla, Atassut, isumaqarpoq sulinermi ilanngaat salloqittaataasoq
Suleqatigiissitsisuneersoq Tillie Martinussen isumaqarpoq, akitsuutinik qaffaanngikkaluarluni aningaasanut inatsit allat ataqatigiissinneqarsinnaasoq.
- Karsimi “putoq matuniarlugu” allatut aningaasalersuinissamik innersuussisimavugut, taanna tusagassiorfinnut nalunaartueqarnermi oqarpoq.
- Ilanngaassivik pisariaqanngilluinnartoq atuutilersinneqarneralu akisoorujussuaq; taanna unisinneqarli, taava 135-150 millioner koruunit tassani aaneqarsinnaapput.
- KNI-p ingerlatsinerata annertusinera immaqa unammilleqatigiinnermik ajoqusiissaaq, nunatsinnilu inuussutissarsiortut annikitsumik ingerlatsisut matoriaannaapput: 45 millioner koruunit.
- Inatsisartunut inissiat. Taamaaliornikkut aningaasat akitsuutit matussusigaat aaneqarsinnaapput, Tillie Martinussen aningaasaliissutaasinnaasunik taaguivoq.
Tillie isumaqarpoq, Ilanngaassivik ilimagineqartutut sunniuteqanngitsoq, innersuussutigalugillu inatsimmut nassuiaatit.
Atassut Demokraatinut isumaqataanngitsoq
Atassummi siulittaasoq Aqqalu Jerimiassen aamma Ilaanngaassivimmut tunngatillugu isumaqataanngilluinnarpoq.
- Demokraatit ”killilersuisuunngitsutut” imminnut taasarnerat oqaasiinnaasimannguatsiarpoq. Ilanngaassivimmut akuersineq inuillu namminneq akisussaaffiinik atorunnaarsitsineq killersuinngitsutut oqaatigineqarsinnaanngilaq. Aamma akitsuutinik qaffaaqqeqattaarneq killilersuinngitsumik ingerlatsinerunngilaq.
- Akileraarut appartinneqarli
Demokraatit siulittaasuata Nivi Olsenip tunngavilersuutigaa, sulinermut ilanngaammik atuutsitsileqataasimallutik, taamaammammullu akitsuutinik qaffaanermi partiitut tunngavimminnik akiliuteqartariaqarsimallutik. Partiitut talerperlertut unammillertit pikkuginninngillat.
- Atassummiit taperserluinnarparput sulineq akilersinnaanerusariaqartoq. Ilimaginngilluinnarparpulli ukiumut ataasiartumik sulisunut aningaasanik tunissuteqartarnikkut sulerusussuseq annertusarneqassasoq. Tamannalu nioqqutissanik akitsuusersuinikkut akilerneqartussanngorluni. Ukioq naallugu nioqqutissanut atuisut akiliinerusassapput, ukiumullu ataasiartumik utertinneqartassallutik, Atassutip siulittaasortaava taamatut appisaluussivoq.
- Sulerusussuseq qaffassarniaraanni akileraarut appartinneqartariaqarpoq! Tamannalu akissaqartissinnaavarput sukkavallaamik namminiilivinniarsariunnaarutta. Inuit tamatta pisortaniit sernersugaajunnaarutta, akisussaaffiiagaajunnaarlutalu, nammineq inuttut suliassarpassuagut pisortaniit suliarineqarpallaarunnaarpata.