Suleqatigiissitsisut pisassanik qaffaanerit isornartorsioraat: Tassanngaannaq aaqqiineq
Inuussutissarsiuteqartut biologillu isumaqatigiissutigisinnaasaannik ukiuni arlalinni atuussinnaasumik isumaqatigiissusiortoqarnissaa partiip piumasaraa. Taamaasiornermi politikerit pisasseeqqinnissamut kajuminnerat pakkersimaarneqalersinnaavoq.
Qaleralinnik, qilalukkanik saattussanillu Naalakkersuisut immikkut pisasseeqqissimanerat Suleqatigiissitsisut isornartorsiorpaat.
- Kinguaassagut sunik inuussuteqassappat? partiip Kommuneqarfik Sermersuumi siulittaasua, Louis Sigurdsen tusagassiutinut nalunaaruteqarluni aperivoq.
- Anguniagaq tassaavoq nungusaataanngitsumik aalisarnissaq piniarnissarlu. Nungusaataanngitsumik atuineq isumaqaannarpoq aamma siunissami isertitaqartassasugut. Aalisarpallaarneq pissutigalugu piffissani piniarfiluttuni qanoq iliussaagut?
Louis Sigurdsenip isornartorsiorpaa qaffaanerit tamaasa biologit innersuussutaat qaangerlugu qaffaasoqartarnera. Qeqertarsuup Tunuani qalerallit Sisimiunilu saattussat eqqarsaatigalugit, qaffaalinnginnermi innersuussutit qaangerneqareersimapput.
- Tassannngaannaq aaqqiisarneq nunatsinnut ilisarnaataajunnaartariaqarpoq. Siunissamut qulakkeerinnilluni aaqqiissuteqartarneq pisariaqarpoq. Naalakkersuisut piffissamut
sivisunersumut eqqarsannginnerat ilumoorsinnaanngivippoq.
Siunissamut ungasinnerusumut isumaqatigiissutit
Politikerit immikkut pisasseeqqinnissamut kajuminnerat peerniarlugu, Louis Sigurdsen siunnersuuteqarpoq ukiuni arlalinni atuuttussanik isumaqatigiissusiortoqassasoq, taamaaliornermilu inuussutissarsiuteqartut biologillu ataatsimoorlutik aaqqiissutissanik ujartuissasut.
- Piniarneq pillugu Siunnersuisoqatigiit, piniartut inuussutissarsiortullu biologinik KNAPK-millu naapeqateqartariaqarput taavalu nunat tamat akornanni isumaqatigiissutit, malittarisassat misissorlugit ataatsimullu ukiunut arlalinnut pisassiissutinik piniagassanillu naapertuilluartumik agguaasseriaatsimik nassaarlutik ukiunullu arlalinnut isumaqatigiissuteqarlutik.
- Tamaaliornikkut nunatsinni inussutissarsiutit annersaanni politikerit pisassiissutinik politikkimut sangutitsisinnaassusiat atuisinnaassusiat aamma kammalaatissarsiortarnerat akeraqalertarnerallu peerneqassapput.