Suleqatigiissitsisut matoqqasumik ataatsimeersualerput
Suleqatigiissitsisut sapaatiuppat 20. december ataatsimeersualerunik tusagassiortunik, taamatullu inuaqatigiinnik, peqataasinnaasunik aggersaanissamik eqqarsaateqanngillat.
Suleqatigiissitsisut sapaatiuppat 20. december ataatsimeersualerunik matut matoqqassapput.
Partiimi siulittaasuugallartoq Tillie Martinussen taama ilisimatitsivoq.
Sermitsiaq.AG partiip siulersisuunerinut paasiniaavoq ataatsimeersuarnermi tusagassiortut malinnaasinnaanerat paasiniarlugu. Taamatullu pingaartumik siulittaasuugallartoq Tillie Martinussen erseqqissaassuteqarfigalugu partii politikkikkut sulinermut tunngatillugu ammanerusumik ingerlatsinissamut suliniuteqartuartuunermik suaaruteqartuarmat.
Suleqatigiissitsisut matoqqasumik ataatsimeersuarnissaat pillugu Sermitsiaq.AG-p apeqqutaa Tillie Martinussenip akinngilaa, taamaattoq ataatsimeersuareernerup kingorna apersuisoqarsinnaajumaarneranik neqerooruteqarpoq.
Partiip maanna ataatsimeersuarnermini eqqartussavaa ataatsimeersuarnerni tulliusussani tusagassiorfiit qaaqquneqartarumaarnersut, siulersuisuunerit ilisimatitsipput.
Iluaqutissartaqarpoq akornutissartaqarlunilu
Ilisimatusarfimmi adjunkti Rasmus Leander Nielsenip tusagassiorfiit Suleqatigiissitsisut ataatsimeersuarnerannut qanimut peqataasinnaanerat iluaqutissartaqarnerarpaa aammali akornutissartaqarnerarlugu.
Taassuma erseqqissarpaa ataatsimeersuarnerup nalaani tusagassiortut isornarsinnaasunik apeqquteqartarneratigut ataatsimeersuarneq ingerlakkuminaassinnaalissasoq. Aammali tusagassiorfiit peqataanerisigut partiip politikkiminik siammaalertorsinnaagaluartoq.
- Iluaqutissaq tassaavoq anguniakkat suunerinik saqqumilaartitsineruneq, soorlu isumaginninnerup iluani aamma naalagaaffeqatigiinnerup pingaartinneqarnerunissaanik suliniutit. Taamatullu Siumut qaammatini tullerni qinersisitseratarsinnaanera pillugu partiip pisariaqartilluinnarpaa anguniakkaminik siammarterinissani, Sermitsiaq.AG-mut oqarpoq.
Taassuma ilanngullugu erseqqissarpaa Suleqatigiissitsisut tusagassiortunik aggersaannginnerminni ilisarnaatigilluinnakkaminnik killuussisut:
- Suleqatigiissitsisut pilersinneqaramik ilisarnaatigilluinnaraluarpaat ammaneruneq, maannali alloriarnaq killormorluinnaq pivoq. Ammanerunissamimmi oqariartuuteqarput, ukiulli affaani kingullermi isasuuissimasutut taaneqarsinnaapput. Maanna ataatsimeersuartussanngorput torersaassallutik katitereqqissallutillu, Ilisimatusarfimmi adjunkt Rasmus Leander Nielsen oqarpoq.