Suleqatigiissitsisut immikkoortortaqarfia Martinussenimut tatiginnikkunnaartoq
Suleqatigiissitsisut partiitata karsianit aningaasarpassuit pinnersartittarnermut arlaleriaqalunilu neriniartarfimmi nerisarnermut atorneqarsimapput, Kommuneqarfik Sermersuumi partiip immikkoortortaqarfianit taamatut isumaqartoqarpoq.
Suleqatigiissitsisuni eqqissiviilliorneq sisamanngormat unnukkut ingerlaqqippoq.
Partiip Kommuneqarfik Sermersuumi immikkoortortaqarfianit tusagassiorfinnut nalunaaruteqarnermi siulittaasuugallartoq Tillie Martinussen partiillu siulersuisuuneri tatigiunnaarlugit oqaatigineqarpoq.
Immikkoortortaqarfik allappoq, nuna tamakkerlugu siulittaasuugallartup Tillie Martinussenip nammineq inuttut atugassaminik nioqqutissanut kiffartuussinernullu partii ”tupannaannartumik annertoorujussuarnik” akiliisittarsimagaa.
Tillie Martinussenip Sermitsiaq.AG-mut siusinnerusukkut aalajangiussimallugu oqaatiginikuuaa, aningaasartuutaasimasut tamarmik partiimut attuumassuteqartut, isumaqarnerarlunilu inuit isornartorsiuinerat aningaasartuutaasimasunut tunngaviusunik ilisimasaqannginnerat pissutaasoq.
Immikkoortortaqarfimmilli isumaqartoqarpoq, atuisimaneq Suleqatigiissitsisut ammasumik ingerlatsinissamik inuiaqatigiillu aningaasaataannik akisussaassuseqartumik aqutsinissamik anguniagaannut naapertuutinngilluinnartoq.
Amerlanerussuteqartut aningaasanik atuisimanermut aalassatsinneqartut
Partiimmi aningaasaataasa amerlanersaat partiimut tapiissutaallutik pisortat karsianinngaanneersuupput:
- Kommuneqarfik Sermersuumi immikkoortortaqarfiup siulersuisuini amerlanerussuteqartut taamaammat tupaallaatigisimavaat, siulersuisuunerit qanittukkut ataatsimiinnerminni, partiip karsiata imaqarnissaa qulakkeeqqaarnagu, siulersuunerillu akuersiteqqaarnagit siulittaasuugallartup partiip aningaasaataanik atuisimaneranik akuersaarsimanerat.
- Partiip missingersuutai tamangajalluinnarmik pisortat partiimut tapiissutaanneersuupput. Uagut politikkikkullu partiit allat taamaammat pisussaaffeqarpugut, akisussaassuseqartumik aningaasanik taakkunannga atuinissamut aamma Naalagaaffeqatigiinni akileraartartut akiliutaanneersuunerannik eqqaamanninnissamut, immikkoortortaqarfik allappoq.
Siulittaasup tulliani aningaaserissumillu atsiorneqarsimasoq
Nalunaarut siulittaasup tullianit Mathias Lauritz Matsiasenimit aningaaserisumillu Flemming Nielsenimit atsiorneqarsimavoq.
Louis Sigurdsen immikkoortortaqarfimmi siulittaasuusoq siulersuisuunernilu ilaasortaasoq immikkoortortaqarfimmit aamma tatigineqarunnaarpoq.
Immikkoortortaqarfik naapertorlugu, partiip karsia atuisimanerujussuaq pissutigalugu maanna imaarussimavoq:
- Pinnersartinnermut neriniartarfinnullu tupinnaannartumik aningaasarpassuit atorneqarsimasut
- Tupinnaannartumik aningaasarpassuit pinnersartinnermut, ulluinnarni inuussutissanik pisiniartarnermut arlaleriaqalunilu neriniartarfinni nerisarsimanermut, kiisalu angalanermi aningaasartuutinut, oqarasuaammik atuinermi akiligassanut aamma internetsikkut toqqaannartumik aallakaatitanut aningaasartuutinut atorneqartarsimapput.
- Soorunami politikkikkut suliaqarneq aningaasanik naleqartarpoq, Tillielu tamatumunnga pikkorissupilussuulluni. Kisianni taamak annertutigisunik aningaasanik atuisimaneq pakatsissutigalugulu nuannaanngissutigaarput, immikkoortortaqarfik allappoq.
Upernaamullu kommunimut qinersisoqartussanngorpat, partiip qineqqusaarnissaanut karsip imaqannginnera periarfissaqartitsivallaanngilaq.
Immikkoortortqarfiup aamma nuna tamakkerlugu ataatsimeersuartoqarsimannginnera isornartorsiorpaa:
- Partiimi ilaasotat taamaammat siulersuisuunerit katitigaanerannut siulersuisuunerillu 2019-mi 2020-ilu aningaasaqarnermik aqutsisiamanerannut isummersinnaasimanngillat.