Skip to main content

Suleqatigiissitsisut eqqartuussissuserisumut suliakkiisut

Suleqatigiissitsisut aningaasaqarnerat pillugu aaqqiagiinngissuteqarneq ingerlaqqippoq. Partiip eqqartuussissuserisoq aqqutigalugu, partiimik pilersitseqataasoq siulersuisuunernilu ilaasortaasimasoq Jan Joe Seidsen partiip aningaasaatai pillugit kusanaatsumik pissusilersorlunilu tamanut saqqummiussiarneranik taamaatitseqquaat.

Partiimut tapiissutinik inuttut nammineq atuilluni atornerluineraanerit, siulittaasutut atuuffimmik isumaqatigiinngissuteqarnerit, saqitsaassutigisanik suliaqarnerit partiimilu avissaartuunneq.

Suleqatigiissitsisut siulittaasorigallagaata siulersuisuunerillu aamma silersuisuunerni ilaasortaasiamsut arlallit Michael Rosingillu partiimi suli siulittaasuusutut isumaqartup akornannni aaqqiaginngiissutigineqartut annikitsuinnaanngillat.

Suliamut atatillugu kingullertut partiip siulersuisuunerisa siulittaasuugallartullu Tillie Martinussenip Jan Joe Seidsen Facebookikkut tusagassiorfitsigullu paasissutissanik tamanut saqqummiussarunnaarsinniarlugu eqqartuussissuserisoq suliamut atatillugu suliaqartilersimavaat.

Tamanna Facebookikkut saqqummiussami atuarneqarsinnaavoq

 

Partiip ammasumik ingerlatsinissamut kaammattuutaanik malinnissimasoq

Eqqartuussissuserisoq allakkamini allappoq, Jan Joe Seidsen partiip ilumini aningaasartuutai pillugit eqqunngitsunik paasissutissiisarlunilu oqaatsinik eqqunngitsunik saqqummiussisarnerminik unitsitsinissaa aamma unnerluutigisimasaminik oqaaserisimasaminillu tunuartitsinissaa piumasarisimallugu.

Jan Joe Seidsenili isumaqarpoq, partiip nammineq politikkianik malinniinnarsimalluni.

- Kukkusumik iliuuseqarsimanera takusinnaanngilara. Partiip akileraartartut aningaasaataannik atuisarneq pillugu ammalluinnartumik pissusilersortarnissamik politikkia malissimavara, taanna Sermitsiaq.AG-mut oqarpoq.

Jan Joe Seidsenip Tillie Martinussenip partiillu 2018-imi oqariartuutaat innersuussutigaa, tassani Doris j. Jensenip benzinamik atuisimanera pillugu suliamut atatillugu Tillie Martinussen siunnersuuteqarpoq, Naalakkersuisuni Inatsisartunilu sulinermut atatillugu akileraartartut akiliutigisaannik pisortat atuinerannut uppernarsaatit tamarmik - ilassinninnerit tamarmik aamma angalasimanermut uppernarsaatit tamarmik internetsikkut tamanut saqqummiunneqartassasut.

Eqqartuussissuserisulli allakkamini Jan Joe Seidsen piumaffigaa, partiip aningaasaqanera pillugu paasissutissat allanut tusarliuteqqusaanngitsut pillugit tamanut saqqumiussisarnerminik unitsitsissasoq.

- Partiimi tatigisaallutit aningaaserisuusimasutut sakkortusisatut pisussaaffigivat, unneqqarissumik iliuuseqartarlutillu nipangiussisimasussaatitaanerit, eqqartuussissuserisoq allappoq.

"Eqqartuussivitsigoortitsinissamik" aarlerisaarineq

Suleqatigiissitsisut eqqartuussissuserivisa allagaanni naggasiullugu arlalinnik piumasaqaateqartoqarpoq, taakkunani Jan Joe Seidsen piumaffigineqarpoq, allakkat tiguneraniit ullut arfineq-marluk qaangiutsinnagit piumasaqaataasnik malinnissasoq.

Piumasaqaatinik malinninnak ajoqutaasinnaasumik pissusilersornerit ingerlatiinnarukku, naatsorsuutigissavat Suleqatigiissitsisut eqqartuussivimmut suliakkiuteqarnissaat.

Jan Joe Seidsenip eqqartuussissuserisup saaffiginnissutaa eqqissisimasumik tiguaa.

- Eqqartuussissuserisup oqaatigaa suliffeqartinneqarsimasunga, taamaassimanngilangali, partiimi ilaasortat allat assigalugit partiimi kiffaanngissuseqarluni sulinissamut piginnaatitaasimavunga.

Jan Joe Seidsenip oqaluttuaraa, suliamut atatillugu qanoq inissisimanini tusarniarlugu eqqartuussissuserisumut saaffiginnissimalluni.

- Eqqartuussissuserisoq isumaqarpoq, kukkusumik iliuuseqarsimanngitsunga, niuerneq matumani pineqarmat aamma atorfeqarnermi atugassarititaasut pineqanngimmata. Nipangiussisimasussaatitaanermut unneqqarissumillu iliuuseqarnissamut atsiugaqarsimanngilanga.

Sermitsiaq.AG-mit Tillie Martinussen partiillu siulersuisuuneri suliaq pillugu sapaatip akunnerata ingerlanerani oqaaseqartinniarneqaraluarput, iluatsinneqanngitsumilli.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER