Skip to main content

Suleqatigiissitsisut aqutsisui politiinut unnerluutigineqartut

Suleqatigiissitsisuni ilaasortat arlallit partiip aqutsisui politiinut unnerluutigisimavaat. Nuna tamakkerlugu ataatsimeersuarnissamut, ilaasortat partiip aningaasaataanik siulittaasutullu atuuffik pillugit oqalliffigisassaannut suli aggersaasoqarsimanngilaq.

Suleqatigiissitsisuni ilaasortat tallimat Tillie Martinussen siulersuisuunernilu ilaasortat sisamat qanittukkut politiinut unnerluutigisimavaat.

Ilaasortat unnerluutiginnittut naapertorlugit, Suleqatigiissitsisut aningaasaataannik, partiimut attuumassuteqanngitsumik nammineq inuttut atugasatut atuisimavallaarneq pissutigalugu unnerluutiginnittoqarsimavoq.

Sermitsiaq.AG-mit Tillie Martinussen oqaaseqartinniarneqaraluarpoq, taannali siulersuisuunernilu ilaasortat sinneri oktobarip 24-anili pissarsiassaasimanngillat.

Suleqatigiissitsisut Kommuneqarfik Sermersuumi immikkoortortaqarfiani ilaasortaq Flemming Nielsen oqarpoq, partiip siulersuisuunerini suliaq aaqqiiffiginiarlugu misilinneqarsimagaluartoq, allatullu periarfissaqannginnermi suliaq maanna politiinut nalileqquneqarsimasoq. 

- Nuna tamakkerlugu ataatsimeersuarnissamut, pisoq manna pillugu soorunami oqaluuserinniffigisassatsinnut qaaqqusissumik tigusaqarsimanngilanga. Misigisimasavulli paasissutissallu pigisavut aallaavigalugit, nammineq inuttut atugassanut aningaasanik atuisoqarsimasinnaasoq isumaqarpugut. Pisut pereerput, siulersuisuunerillu atuisimanerit tamaasa akuersissutigisimavaat, taamaammat iliuuseqarfigisinnaasatuarput tassa unnerluutiginninneq, taanna oqarpoq.

Inerteqquteqartitsiniarneq

Michael Rosing politiinut unnerluutiginneqataasoq, sapaatip akunnerani matumani inerteqquteqartitsiniarnermini ajorsartinneqarpoq, Tillie Martinussenip partiillu aningaaserisuata partii sinnerlugu taarsigasarsisinnaanerat akiitsoqalersitsisinnaanerallu pinngitsoortinniarlugit.

Eqqartuussivimmilli isumaqartoqarpoq, Michael Rosing partiip siulittaasuatut pisortatigoortumik atuuteqqilersimanngitsoq, taamaammallu inerteqquteqarnissamik piumasaqarnera itigartitsissutigineqarluni, aamma suliamut aningaasartuutinik akiliisussanngortinneqarsimavoq.

Politiinulli unnerluutiginninneq Suleqatisiissitsisuni pisimasuni kisiartaanngilaq. 

Sapaatip akunnerani qaangiuttumi Suleqatigiissitsisuni siulittaasuugallartup Tillie Martinussenip Facebookimini allaaseraa, sapaatip akunnerini kingullerni Inatsisartut ataatsimiittarfianni ataatsimeeqataasimannginnerminut suut pissutaanersut.

- Uannut, siulersuisuunernut, sulisutsinnut partiimullu attuumassuteqartunut ulorianartutut nalilerneqarsinnaasunik pisoqartarsimavoq. Isumannaatsuunerma qularutigiunnarnissaata tungaanut ininnit anisinnaanera killilersimaaqqagallassaginga partii peqatigalugu aalajangerparput, taanna Facebookikkut allappoq.

Politiinut unnerluutigineqarsimasoq

Tillie Martinussenilu naapertorlugu tamanna politiinut unnerluutiginninnermik kinguneqarsimavoq.

- Nammineq inuttut isumannaasuunissara pillugu suliami immikkuualuttunik soqutiginnittoqarnera takusinnaavara, ilaatigut politiinut unnerluutiginnittoqarsimanersoq pillugu apeqquteqartoqarsimalluni, taanna allappoq.

Neriuppunga tamassi paasisinnaassagissi, immikkuualuttut oqartussat sulinerannut ajornerulersitsisinnaasut pillugit paasissutissiisinnaannginnera. Uppernarsarsinnaavarali politiinut unnerluutiginnittoqarsimasoq, aamma tatigilluinnarpara politiit suliamik naammassinnissinnaasut, Facebookimi ilanngullugu allappoq.

Nuna tamakkerlu ataatsimeersuarneq decebarimi ingerlanneqassasoq

Siulittaasutut atuuffik partiillu aningaasaqarnera pillugit aaqqiagiinngissuteqarneq nuna tamakkerlugu ataatsimeersuarnermi partiimi ilaasortat oqaluuserissavaat. Tillie Martinussenip ilisimatitsissutigisimavaa decembarip qaammataani nuna tamakkerlugu ataatsimeersuartoqarniartoq.

Aaqqissuisoqarfiup paasissutissaatai malillugit nuna tamakkerlugu ataatsimeersuartoqarnissanut suli qaaqqusisoqarsimanngilaq, qaaqqusisoqartussaavorlu ulloq ataatsimiiffissaq ullunik 30-nik sioqqullugu.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER