Suleqatigiinnissamut isumaqatigiissut: Nuummi kinguaassiuutitigut atornerluisarnerit unitsinniarneqarput
Kommuneqarfik Sermersooq, politiit peqqinnissaqarfillu Nuummi meeqqat inuusuttullu kinguaassiuutitigut atornerlunneqartarnerisa akiornissaannut suleqatigiinnissamik isumaqatigiissuteqarput.
Kommuneqarfik Sermersuujugaluarpat, politiiugaluarpata peqqinnissaqarfiugaluarpalluunniit meeqqamik kinguaassiuutitigut atornerlunneqartumi paasisaqartoq pasitsaassaqartorluunniit, oqartussat ataatsimoorlutik pilertortumillu suleqatigiittassapput.
Kommunip, politiit peqqinnissaqarfiullu suleqatigiinnissamut isumaqatigiissutaanni oqariartuut pingaarneq taannaavoq.
Nuummi meeqqamik inuusuttumilluunniit kinguaassiuutitigut atornerluisoqarneranik paasisaqarnermi pasitsaassaqarnermilu pilertortumik ataqatigiissaakkamillu suligasuartoqartassaaq.
Isumaqatigiissutip ilaatigut qulakkiissavaa Nuummi oqartussat akornanni ataqatigiissaakkamik sulisoqarnissaa. Meeqqanik inuusuttuaqqanillu kinguaassiuutitigut atornerluisoqarsimatillugu sullissinerup eqqortumik ingerlanneqarnissaa.
Kiisalu sulisut sullissisut ataatsimoorussanik maleruagassaqarnissaat qulakkeerneqassalluni.
Isumaqatigiissummi ilanngunneqarpoq pinerlineqartup sullinneqarnermini katsorsarneqarnissamut neqeroorfigineqartuarnissaa.
Suliat tallimaagaangata ataaseq Nuummiittarpoq
Tasiilaq pillugu politiit, kommunip Namminersorlutillu Oqartussat isumaqatigiissutaat assigusoq 2019-imi atulereerpoq.
Kalaallit Nunaata Politiivisa 2019-imi ukiumut naatsorsuutaasa takutippaat meeqqat 15-it inorlugit ukiullit nuna tamakkerlugu 225-it kinguaassiuutitigut pinerlineqarsimasut. 225-ini taakkunannga 55-it Nuummi nalunaarutigineqarsimapput.
Suleqatigiinnermi suliaq tamarmiusoq isigalugu eqaannerusumik sullissisoqalernissaa anguniarneqarpoq.
Upalungaarsimasut politiinit, peqqinnissaqarfimmit kommunimiillu sinniisoqartut pilersinneqassapput. Upalungaarsimasut suliassaraat pisortat akimorlugit suleqatigiinnerup pitsaasumik ingerlanissaa, suleqatigiinnissamullu iliuusissatut pilersaarutit suliarinissaat.
Suliniutip uku anguniagarai:
- Meeqqat inuusuttullu kinguaassiuutitigut atornerlunneqarsimasut pillugit suliat sukkasuumik pitsaasumillu suliarineqarnissaat
- Meeqqat kinguaassiuutitigut atornerlunneqarsimasut, paasisaqarnermit pasitsaassaqarnermiilluunniit ingerlaannartumik ikiorserneqarnissamik neqeroorfigineqartarnissaat.
- Sulisut oqartussanilu qitiusumik inissisimasut nalornissanngillat qanoq suleriassallutik.