Juunip aallartinnerani naalagaaffeqatigiit ukiumoortumik naalagaaffeqatigiit ataatsimiinnerat Nuummi pissaaq. Suliat arlallit Danmarkip suleqatigineqarnerani Kalaallit Nunaanni naammagisimaarinninnginnermik pilersitsisut kinguninngua ataatsimiinneq ingerlanneqassaaq.

Naalagaaffeqatigiit ataatsimiinnerat pingasunngornermi 7. juni pissaaaq, tassani ministeriuneq Mette Frederiksen, Naalakkersuisut siulittaasuat, Múte B. Egede (IA), aanna Savalimmiuni lagmand Aksel V. Johannesen tamarmik peqataassapput.

Naalagaaffeqatigiit ataatsimiinnerat sioqqullugu 6. juni Nunanut Allanut, Sillimaniarnermut Illersornissamullu Politikkikkut Ataatsimiititaliaq ataatsimiissaaq. Ataatsimiititaliaq Savalimmiut, Kalaallit Nunaata Danmarkillu ataavartumik politikkikkut suleqatigiinnerannut ilassutaavoq, nunanut allanut, sillimaniarnermut illersornissamullu politikkimik aallussisoq.

Suliat ajornartorsiutaasut

Ataatsimiinnermi oqaluuserisassaqarluarpoq, tassami Naalakkersuisut piffissami kingullermi danskit naalakkersuisuinut suliani arlalinni naammaginninnatik oqariartuuteqarput.

Ilaatigut Issittumi aallartitamik toqqaaneq pineqarpoq, tassani Naalakkersuisut kissaatigisaraluattut danskit naalakkersuisui inummik Kalaallit Nunaanneersuunngitsumik toqqaapput.

Múte B. Egedep aamma spiralilersuisoqarneranik suliap qulaajarneqarnissaanut tunngatillugu danskit naalakkersuisui kinguarsaanerarlugit isornartorsiorpai.

LÆS OGSÅ: Mútep Løkke ataqqinninnginnerarlugu isornartorsiorpaa

Danskit naalakkersuisuinik nutaajusunik SVM-iusunik suleqateqarneq, siornatigut Socialdemokraatiinnaasunit ajornerusoq, Naalakkersuisut siulittaasuat isumaqarpoq. Múte B. Egede p oqarnera naapertorlugu Moderaternemi siulittaasoq Lars Løkke Rasmussen pitsaanerusumik suleqatigiinnissamut aporfilersuivoq.

Illuanik aamma Naalakkersuisut peqqinnissaqarfimmut tunngatillugu ikiorneqarnissamik qinnuiginninnerminni suli paasisaqarsimanngillat, qinnuiginninnerlu taanna pisortatigoortumik suli akissuteqarfigineqanngilaq – tassa tamanut suli saqqummiussisoqanngilaq.