Skip to main content

Suleqataasut: Angerlarsimaffeqanngitsut pillugit oqalliffik suliniut pitsaasuuvoq

Naalakkersuisut nuna tamakkerlugu angerlarsimaffeqanngitsut pillugit oqallittarfiat suliassaqartunit tikilluaqquneqarluarpoq.

Kofoeds Skolen, ilisimatusartut, peqqinnissaqarfik kommunillu angerlarsimaffeqanngitsuunerup qaangernissaanut suleqatigiinni nutaani peqataasunut ilaapput.

Suleqatigiit nutaat, nuna tamakkerlugu angerlarsimaffeqanngitsuuneq pillugu oqalliffimmi peqataasut, angerlarsimaffeqanngitsunik innuttaasunillu inuuniarnermikkut ilungersuuteqartunik ullut tamaasa sullissisarput attaveqartuullutilluunniit. Taakku angerlarsimaffeqanngitsuunerup qaangernissaanut iliuusissanik oqaloqatigiittassapput.

Teqeqqut tamarmik misissorneqarput

Suleqatigiinnissaq nutaaq pillugu suliassaqartut iluarisimaarinnipput.

- Nutaatut nuna tamakkerlugu suleqatigiinneq qitiutinneqarpoq. Naalakkersuisunit kommunit peqataatinneqarnerat pitsaasuuvoq, taakkuuppummi angerlarsimaffeqanngitsunik inuuniarnermikkullu ilungersuuteqartunik qanimut sullissisuusut, sociolog Ilisimatusarfimmilu lektori, Steven Arnfjord Sermitsiaq.AG-mut oqarpoq.

Nuummi Kofoeds Skole aamma ataatsimeeqqaarnermi peqataavoq. Suliassaqarfiillu akimorlugit suleqatigiinnissaq iluarisimaarpaat.

- Angerlarsimaffeqanngitsuunermi ajornartorsiutit assigiinngitsorpassuit sammillugit oqallinneq ingerlasinnaalerpoq. Suliassaqartut assigiinngilluinnartut oqalliffimmiinneranni sammisassat tamarmik sammineqarsinnaalerput, Gujo Thorsteinsson oqarpoq.

Kommune: Suleriuseqarnissaq pingaaruteqarpoq

Naalakkersuisut nutaat innuttaasut tamarmik 2035-imi  angerlarsimaffeqarnissaannik anguniagaqarput. Anguniakkamut suleriaqqinnermi angerlarsimaffeqanngitsut pillugit oqalliffimmik pilersitseqqammerput.

Oqalliffimmi kommunit, INI A/S, politiit, peqqinnissaqarfik, Allorfik, Kofoeds Skole, pinerluuteqarsimasunik isumaginnittoqarfik, Ilisimatusarfik, isumaginninnermut aqutsisoqarfik Namminersorlutillu Oqartussani naalakkersuisoqarfiit arlallit sinniisoqarput.

Kommune Qeqertalik oqalliffimmi aamma sinniisoqarpoq. Kommunillu peqataatinneqarnerat borgmester Ane Hansenip nuannaarutigaa.

- Angerlarsimaffeqanngitsuunerup oqallisigineqarnissaa qanorlu iliuuseqarfigineqarnissaa pingaarutilerujussuuvoq, ukiunimi kingullerni ajornartorsiut takussaaneruleriartorpoq. Ikiuiniarnermi imminut ikiorsinnaalernissamut ikiuutit qitiusariaqartutut uagut isigaarput. Tassa innuttaasut nammineerlutik angerlarsimaffeqarsinnaaneq aningaasanillu aqutsisinnaaneq ilikkarsinnaaniassammassuk, borgmester Ane Hansen (IA) oqarpoq.

Ane Hansen ilisimatitsivoq kommunimi angerlarsimaffeqanngitsut 22-t naatsorsorneqarsimasut. Amerlanerpaartaat illoqarfinniipput.

Imminut ikiorsinnaalernermut ikiuutit

Imminut ikiorsinnaalernissamut ikiuutit Kofoed Skolemit aamma qitiutinneqarput:

- Suleriuseq aamma meeraanermit aallartittariaqarpoq. Meeqqat inuuniarnermikkut ilungersuuteqarlutik peroriartortut inersimasunngornermi Kofoed Skolemiittalernissaat orniginartinngilarput, naak uagut ikiuinerput pitsaasuugaluartoq. Takorusunneruarput inersimasut isumannaratik nammineersinnaanissaaq, Gujo Thorsteinsson oqarpoq.

Nuna tamakkerlugu angerlarsimaffeqanngitsut pillugit oqalliffimmi sinniisoqartut decemberimi ataatsimeeqqissapput, tassani sammineqassalluni ”Housing First”.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER