Suleqataasut Anders pillugu naneruummik ikitsipput
Anders Brønsip Polar Seafoodimut isumalerujussuunera qujamasuutigalugu takutinniarlugu umiartortunngorniat Nuummi Polar Seafoodip allaffiata silataani ippassaq unnukkut naneruutinik ikitsipput.
Jensinnguaq Jerimiassenimut, aalisarnerup iluani ilinniagaqarusuttumut sulerusuttumullu, pingaaruteqarpoq takutissallugu Polar Seafoodip imminerminut inuusuttunullu allanut qanoq isumaqartiginera.
Uanga oqaluttuassara
- Polar Seafoodimi umiartortunngorniat siulliit ilaattut oqaluttuassara oqaluttuarerusuppara, qujamasunnera takutikkusuppara, Polar Seafoodillu uannut ukiuni kingullerni iliorsimaneri uannut ataqqinaataaneri takutikkusuppakka, Jensinnguaq Sermitsiaq.AG-mut oqaluttuarpoq. Taanna suliffeqarfimmi sulinermut atatillugu ilinniagaqalersimavoq.
- Inuit arfineq-pingasuulluta 2016-imi neqeroorfigitippugut angallatip naalagatut, maskinalerisut naalagaattut tunisassiorfimmilu naalakkatut ilinniaqqissinnaanissatsinnut neqeroorfigitippugut. Alla peqatigalugu kilisaammi tunisassiorfiup naalagaatut ilinniassallunga aalajangerpunga, Jensinguaq nassuiaavoq.
Suliffimmik misiliineq
- Ilinniarninnut atatillugu angallatini assigiinngitsuni suliffimmik misiliisarpunga. Taamaaliornermi ineriartorsimavunga, tunisassiorfiillu assigiinngitsunik aqunneqarsinnaaneri ilikkarsimallugu. Inuussutissarsiornerup iluani taamaallaat ineriartunngilanga, ilinniakkalli uuma ingerlannerani suliffimmillu misiliininni inuttut aamma ineriartorsimavunga. Taamaammat Polar Seafood ilinniaqatikkalu qujassutissaqarfigeqaarput, Jensinnguaq oqarpoq.
Suliffeqarfik Anders Brønsip ineriartortillugu peqataaffigisimasaa qujassutissaqarfigeqaa.
Qujamasunneq
- Amerlavugut ilinniagaqarsimallutalu suliffissaqalersimasugut. Taamaammat Anders Brøns eqqaaniarlugu Nuummi allaffiup silataani Maniitsumilu tunisassiorfiup eqqaani naneruutinik ikitsiartorpugut, Jensiinguaq Jerimiassen oqaluttuarpoq.