Sukkortunut sullissivissaq Permagreenip sanaartussavaa
Nuummi Inuunerissaavik Steno Kalaallit Nunaat sanaartornissaanut Namminersorlutik Oqartussat Permagreenilu isumaqatigiissuteqarput. Qitiusumik sullissivimmik sanaartorneq 2022-imi aasakkut aallartinneqassaaq 2024-imilu naammassinissaa naatsorsuutigineqarlunim Namminersorlutik Oqartussat tusagassiuutinut nalunaarummi ilisimatitsipput.
Qatserisartoqarfitoqaq suli isaterneqarluanngitsoq, nutaamik sanaartorneq aallartinneqassaaq. Nuup qeqqani Dronning Ingridip Napparsimmavissuani Qitiusumik Sullissivik nutaaq ukiut marluk qaangiuppata piariissaaq, nakorsiartunut iliuuseqarnermut pitsanngorsaataassalluni.
Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen isumalluartoq, naammassinissaanut qilanaarpoq.
- Diabetes type 2- mik nappaateqartut, nappaatillu allat inooriaatsimut attuumassuteqartut ukiuni kingulliuinerusuni amerliartornerat, inuiaqatigiinni misigineqarpoq, taamaammat Inuunerissaavik Steno Kalaallit Nunaannik nutaamik sanaartornikkut suliniutigineqarnera innuttaasuni inuunerup naleqassusaata pitsannguuteqartinnissaat nuannaarutigaara, taanna tusagassiuutinut nalunaarummi oqarpoq.
Nappaatit arlallit katsorsarneqassasut
Inissinneqarneratigut qitiusumik sullissiviup napparsimmaviullu akornanni qanimut suleqatigiinnermik qulakkeerinnissaaq. Inuunerissaavik Steno Kalaallit Nunaat nunatsinni Peqqinnissaqarfimmut ilaasoq, qitiusumik sullissivittut tassaassaq nunarput tamakkerlugu diabetesimik-, pualluummiik anigugassaanngitsumik (KOL) nappaatilinnut, qaffasissumik taqqanut naqitsinilinnut tamanut iluaqutaasussamik, qitiusumik nakorsartiffiullunilu paasisimasaqarfiussaaq, Naalakkersuisut ilisimatitsipput.
Qitiusumik sullissivimmik sanaartornissamut aningaasaliisuuvoq aningaasaateqarfik Novo Nordisk Fonden, Naalakkersuisullu maanna sivisujaamik isumaqatigiinniareernerup kingorna nunatsinni sanaartugassanik suliaqartartoq Permagreen isumaqatigiissusiorfigineqarluni sanaartortussanngorpoq.
llussamik 2500 m2-isut annertutigisumik sanaartornissamut siunnersuusiortuupput illussanik titartaasartut Friis & Moltke, Rambøll aamma Permagreen.