Sukkorneq pillugu ernumaneq: Nuummi nutaamik katsorsaaviliortoqassaaq
Sukkornermik nappaateqartunut katsorsaavimmik qitiusumik angisuumik pilersitsinissamik takorluugaqpiviusunngortinneqassappat Kalaallit Nunaanni sukkortunik katsorsaasarneq siuariarujussuarsinnaavoq.
Innuttaasut tallimangajaagaangata ataaseq sukkornermik imaluunniit nappaammik inooriaatsimut attuumassutilimmik 2030-mi nappaateqalersimassaaq. Tamanna inuiaqatigiinnut inunnullu ataasiakkaanut akisoorujussuussaaq. Pissutsimmi qanoq iliuuseqartariaqalersitsipput, Naalakkersuisut nalunaarput, taakkualu Novo Nordisk Fonden peqatigalugu Nuummi Diabetes Centerimik pilersitsinissamik isumaliutiginnipput.
Aviisi AG taama allappoq.
Sanaartorfiusinnaasoq eqqarsaatigineqareersimagunarpoq: Tassa sumiiffimmi Nuummi qatserisarfiup ullumikkut inissisimaffigisaani, Sanamit ungasinngitsumi.
Paasissutissat najoqqutassiami 70-inik quppernilimmi atuarneqarsinnaapput, najoqqutassiarlu Steno Diabetes Centerissatut ilimagineqartumut sukumiisorujussuarmik sinaakkusersuiffiusoq maanna tusarniaassutigineqarpoq. Najoqqutassiami ineriartorneq ernumaammernartorujussuaq allaaserineqarpoq:
- Sukkortut, ataavartumik puakkut nappaatillit (KOL) aamma ataavartumik aap naqitsineranik qaffasittoortut (hypertension) amerlassusaannik naatsorsuinerit nutaanerpaat takutippaat, sukkornermik aamma KOL-imik nappaatillit nalunaarsorsimasut 1500- t missaanniittut kiisalu ataavartumik aap naqitsineranik qaffasittoortut 5.500-t missaanniillutik. Katillugit sukkornermik aamma inooriaatsimut tunngasumik nappaatillit napparsimasut 8.500-t missaanniipput, najoqqutassiami allassimasoqarpoq.
Immikkut ilisimasallit siunissamut aamma isiginiarsimapput, tamatumanilu ineriartorneq pitsaanngitsuinnarmik sammiveqarluni ingerlariaqqissalluni:
- 2018-imi napparsimasut amerlassusaat, kiisalu iliuuseqarnerup nukittorsarneqarnera misissuilluni nassaartarnermut aamma nappaammik paasisaqartarnermut atatillugu napparsimasut amerlassusaannut qanoq sunniuteqassanersoq suliaqartut naliliinerat tunngavigalugit siumut naatsorsuinerup takutippaa, 2025-mi aamma 2030- mi Kalaallit Nunaanni inuit sukkornermik aamma inooriaatsimut tunngasumik nappaateqartut 8.200-t aamma 9.400-t missaanniissasut.
Aviisimi AG-mi, uani ataani pissarsiarisinnaasanni, atuarnerusinnaavutit: