Sukkaannaq: Nutaamik borgmesterertaalerput
Kiap Charlotte Ludvigsen Kommuneqarfik Sermersuumi borgmesteritut taarsissaneraa pillugu, IA aamma Naleraq "piaartumik" tusagassiorfinnut nalunaaruteqassamaarput.
Kommuneqarfik Sermersooq pillugu assigiinngitsorpassuarnik isummertoqarsinnaagaluarpoq. Ataaserli qularnanngilaq. Borgmesterinngortussaq kommunip iluani torersagassarpassuaqarpoq, politikkikkullu tatigineqalernissamik pilersitseqqinniartariaqarluni kommuneqarfimmi politikkikkut suliat peqqissaartumik ingerlatileqqillugit.
- Ajornartorsiutit piffissami sivitsortumi tulleriaaginnavissimapput, Charlotte Ludvigsenillu aalajangernera kinguneruvoq isumatusaarnerusoq, tassami borgmesteritut allaffik qimappaa. Taama isiorsimasinnaagaluarpoq qangalili, Christian Schultz-Lorentzen, AG-mi aaqqissuisuuneq politikkilu pillugu oqaaseqartartoq oqarpoq.
- Charlotte Ludvigsenip ukiut marluk atuuffimmi issiareerluni borgmesteritut tunuarniuteqarnera tallimanngornermi ualikkut soraarfiup kingorna tusagassiorfinnut nassiunneqarpoq.
”Tatigineqanngikkuma politikkikkut ingerlanniakkagut anguniarnissaanut kommuunitsinni siuttutut inissisimasinnaanngilanga.”, Charlotte Ludvigsen allappoq ilisimatitsillunilu ullut tulliini sulinermini akornusersorneqarumanani.
Demokraatit tunuareersut
Charlotte Ludvigsenip Asii Chemnitz Narup ukiut qulit borgmesterioreerluni isornartorsiorneqartaarnerminit tunuarmat, taarsersimavaa.
Kommuneqarfik Sermersooq ineqarnermut tunngatillugu aaqqissuussaqarsimanerat nakkutilliisunit sakkortuumik isornartorsiorneqarsimavoq. Tamassuma kinguneranik Demokraatit suleqataanermit tunuarput, Charlotte Ludvigsen borgmesteritut tunuarniuteqarumanngimmat.
Inissiat suliffeqarfinnit namminersortunit attartoriarlugit attartorteqqinneqartarnerannut tunngatillugu suliami Siumut qaqilerititsinissamik suliniuteqarpoq sakkortuumillu isornartorsiuilluni.
Suliaq naatsorsuutigisatut kinguneqartoq
Taakku saniatigut attartornissamut pisinermullu katillugit 40 milliuunit koruunit aningaasartuutigineqarsimapput, kommunimi ataatsimiititaliamit akuersisitseqqaartoqarani.
- Asii Chemnitz Narup assigalugu Charlotte Ludvigsen kommunimi atorfilittanit naammaginartumik siunnersorneqarsimanani oqariartorpoq. Taamaakkaluartoq borgmesteri suli akisussaasuunerpaavoq, inissaminiilluinnarporlu tunuarniuteqaannarnera. Aallaqqaataaniit aallartittoqartariaqarpoq. Ajornartorsiutit qaleriiaaginnavissut amerlavallaarput. Suliat mamianartut amerlanerulersinnaapput, maannali ilisimaleriikkagut tunngavigalugu nalilersinnaavarput kommunit iluanni suliat mamianartut nalinginnaanngitsumik annertulluinnartut, Christian Schultz-Lorentzen oqarpoq.
Kina kommunip innuttaasuinut 24.000-ngajannut borgmesterinngussanersoq maanna pissanngatigineqarpoq.
- Inge Olsvig Brandt, naligiissitaanissamut allattoqarfimmi pisortaasoq piukkunnarsinnaavoq. Aqutsinermik misilittagaqarpoq. Tamanna pingaaruteqartuuvoq. Pingaartumik kommunip inissisimaffia eqqarsaatigissagaanni, Christian Schultz-Lorentzen oqarpoq.