Sukaterinerit Mimip atulersinniarnerangai atuutereersut
Ivaaqqamut tunngatillugu suliami angutip tigusarineqarnerani Naalakkersuisoq Mimi Karlsen qisuariaateqarluni allappoq najugaqarfinni sukaterisoqarnissaa piumasarisimallugu. Sukaterutilli pineqartut taakkooreerput malittarisassat qangalili atuuttut.
Meeqqanut, inuusuttunut ilaqutariinnullu Naalakkersuisoq, Mimi Karlsen, meeqqat angersimaffiini inuillu innarluuteqartunut angerlarsimaffinni sukaterisoqarsimanera pillugu tusagassiorfinnut nalunaaruteqarpoq.
- Meeqqanut, inuusuttunut innarluutilinnullu angerlarsimaffiit sukateriffigineqarput. Ingerlatseriaatsit misissorneqarput, ilaatigut sulisut marluujuaannarnissaat piumasaqaatigivara. Pisoq ilungersunarluinnarpoq neriorsuutigissavaralu meeqqanut, inuusuttunut innarluutilinnullu angerlarsimaffiit ukkatarineqassammata.
Ivaaqqami najugaqartumik arnamik innarluuteqartumik kinguaassiutitigut atornerluisimasoq politiinit tigusarineqareersoqlu naalakkersuisoq taama tusagassiorfinnut nalunaaruteqarpoq.
Sukaterinerit suunersut Sermitsiaq.AG-p paasiniarsimavai.
Meeqqanut, inuusuttunut ilaqutariinnullu naalakkersuisoqarfimmi pisortaaneq, Heidi Lindholm ilisimatitsivoq meeqqanut angerlarsimaffinni kiisalu inuit innarluuteqartut angerlarsimaffiini nangilersuinerni, eqqiluisaartitsinermi unnuarsiornernilu sulisut marluusarnissaat pillugu "eqqaasitsisoqarsimasoq". Malittarisassarmi taanna qangali atuutereerpoq.
- Sukaterineq pineqartoq tassaavoq naalakkersuisoqarfiup suliaqartut malittarisassanik eqqaasikkamigit. Taassuma saniatigut suleriutsit assigiinngitsut misissulerpagut allatigut sukaterisoqarsinnaanersoq takuniarlugu, naalakkersuisoqarfimmi pisortaaneq, Heidi Lindholm Sermitsiaq.AG-mut oqarpoq.
Eqqaasitsisoqarpoq arnat innarluuteqartoq septemberip aallartinnerani ernertaareernerata kingorna. Pisoq inuiaqatigiinni aalassatsitsingaatsiarpoq, angullu kinguaassiutitigut atornerluisimasutut, DNA atorlugu paasineqartoq maanna tigummigallarneqarluni.
Attuumassuteqanngitsut maanna misissuisut
Naalakkersuisoqarfimmi pisortaaneq nassuiaavoq suleriutsit politikkillu assigiinngitsut naalakkersuisoqarfimmit maanna misissorneqartut. Tassa angerlarsimaffiini pisortanit ingerlanneqartuni kinguaassiutitigut atornerluisoqarneranik pasitsaassinermi, allatigulluunniit nakuuserniartoqartillugu suliani periutsit misissorneqarput.
- Inuk navialitillugu suleriutsit tamaasa misissorpagut. Najugaqartut isumannannginnissaat misissuinitsinni pingaarnertut inissisimavoq. Periusissiat pitsaasuuppata, najugaqartoq aamma illersorneqassaaq. Periusissiat politikkillu pitsaassusaat misissorpagut, pitsaassuserlu qaffattariaqarpoq, oqarpoq.
Ilanngullugu ilisimatitsivoq arlaannaannulluunniit attuumassuteqanngitsut misissuillutik novemberip aallartinnerani aallartissimasut. Pisortani kommuninilu ingerlatani angerlarsimaffiusuni pissutsit misissorneqassapput.
Pissutsit pingasut misissorneqassasut ukuupput:
- Inuit innarluuteqartut angerlarsimaffiini pissutsit periutsillu
- Inuit innarluuteqartut angerlarsimaffiini kinguaassiutitigut tunngatillugu politikkit pinaveersaartitsinermullu tunngasut
- Najugaqartut isumaat - inuit innarluuteqartut angerlarsimaffiini najugaqartut najukkamik pitsaassusaannik isummernerat
Misissuineq augustimi aappaagu naammassissagatinneqarpoq, misissuinerullu inerneri saqqummiunneqarumaarlutik.